काठमाडौं । सानिमा बैंक र ब्रिटिस इन्टरनेसनल इन्भेस्टमेन्ट पीएलसीबीच १५ मिलियन अमेरिकी डलरको व्यापार ऋण सम्झौतामा हस्ताक्षर भएको छ ।

सो सम्झौताअनुसार प्राप्त ऋण विशेष गरी जलविद्युत् आयोजनाहरूको निर्माणमा प्रयोग हुने हाइड्रो मेकानिकल र इलेक्ट्रो मेकानिकल उपकरणहरूको आयात तथा निर्माण प्रक्रियाका लागि कच्चा पदार्थहरूको खरिदमा प्रयोग गरिनेछ । यस साझेदारीले सानिमा बैंकको ट्रेड फाइनान्स सर्भिसलाई महत्वपूर्ण योगदान पुर्याउने अपेक्षा गरिएको छ ।

सो सम्झौतामा बैंक सीईओ निश्चलराज पाण्डे र ब्रिटिश इन्टरनेसनल इन्भेस्टमेन्टका लगानी निर्देशक एडमिर इमामीले य हस्ताक्षर गरेका छन् ।

यस साझेदारीले नेपालकोे उर्जा आवश्यकतालाई सम्बोधन गर्दै दिगो उर्जा स्रोतहरू परिचालन गर्न महत्वपूर्ण योगदान पुर्याउने बैंकको विश्वास छ । देशको सातै प्रदेशमा १ सय ३४ वटा कार्यालयहरु तथा १ सय २६ वटा एटिएमहरु सञ्चालनमा रहेको बैंकले उल्लेख गरेको छ ।