काठमाडौं । बिहीबारदेखि सेयर बजारमा भारित औसत मूल्य निर्धारण लागू हुने भएको छ । नेपाल स्टक एक्सचेन्ज (नेप्से) ले अन्तिम कारोबार मूल्य निर्धारणका लागि नयाँ विधि लागू गर्ने निर्णय गरेको हो ।
नेप्से सञ्चालक समितिको चैत ५ मा बसेको बैठकले नेपाल धितोपत्र बोर्डबाट स्वीकृत कारोबार सञ्चालन विनियमावली (चौंथो संशोधन) २०८१ कार्यान्वयन गर्ने निर्णय गरेको हो ।
यो व्यवस्था आगामी चैत ७ गतेदेखि लागू हुनेछ । नयाँ प्रणालीअनुसार नियमित कारोबार सत्रको अन्तिम १५ मिनेट अर्थात् अपराह्न २ः४५ देखि ३ः०० बजेसम्म कायम भएको भारित औसत मूल्यलाई अन्तिम कारोबार मूल्यका रूपमा लिइनेछ ।
यदि उक्त अवधिमा कुनै कारोबार नभएको खण्डमा भने पछिल्लो कारोबार मूल्यलाई अन्तिम कारोबार मूल्यका रूपमा कायम गरिनेछ । नेप्सेले नयाँ विधिबाट बजार सञ्चालन थप व्यवस्थित हुने विश्वास लिएको छ । यस विषयमा सम्बन्धित सबै पक्षलाई जानकारी गराइने बताइएको छ ।
प्रतिक्रिया दिनुहोस्