काठमाडौं । बहुराष्ट्रिय कम्पनी डाबर नेपालले नेपालमा थप १० अर्ब लगानी गर्ने भएको छ ।

डाबर नेपालले क्षमता विस्तार तथा उत्पादन विविधिकरणका लागि ९ अर्ब ६८ करोड रुपैयाँ पुनर्लगानीका लागि लगानी बोर्डमा प्रस्ताव गरेको हो ।

प्रधानमन्त्री पुष्पकमल दाहाल ‘प्रचण्ड’को अध्यक्षतमा बसेको लगानी बोर्डको बैठकले डाबरले प्रस्ताव गरे अनुसार उक्त परियोजनाको विस्तृत परियोजना प्रतिवेदन प्राप्त भई बोर्डको मूल्यांकनपश्चात वार्ता प्रक्रिया अगाडी बढाउने निर्णय गरेको हो ।

डाबर नेपालले उद्योगको क्षमता विस्तार थप प्रोडक्ट ल्याउन लगानी गर्ने छः हरकिरत सिंह बेदी

डाबर नेपालले क्षमता विस्तार तथा उत्पादन विविधिकरणका लागि ९ अर्ब ६८ करोड रुपैयाँ पुनर्लगानीका लागि प्रस्ताव गरे अनुसार उक्त परियोजनाको विस्तृत परियोजना प्रतिवेदन प्राप्त भई बोर्डको मूल्यांकनपश्चात वार्ता प्रक्रिया अगाडी बढाइएको लगानी बोर्डले जनाएको छ ।

डाबर नेपालका बिजनेश हेड हरकिरत सिंह बेदी डाबरले क्षमता विस्तार तथा उद्योगको उत्पादन विविधिकरणको लागि लगानी गर्न लागेको बताए ।

“डाबर नेपालले नेपालमा केही प्रोडक्टहरु थप उत्पादन गर्न खोजेको छ,”बेदीले लगानीन्यूजसँग भने,“विरगन्जमा रहेको उद्योगको क्षमता बढाउने र थप वस्तुको उत्पादन गर्ने हाम्रो नीति रहेको छ।”

नेपालमा विदेशी लगानीमा स्थापना भएको सफल कम्पनीको रुपमा डाबर नेपाललाई लिने गरिन्छ । तीन दशक अगाडि डाबर नेपालमा भित्रिएको थियो । तीन दशक अगाडि ८ करोड लगानीमा डाबरले नेपालमा उत्पादन शुरु गरेको थियो । अहिले डाबरको लगानी ४ अर्बभन्दा बढी भइसकेको छ ।

डाबर नेपाल प्रालिमा डाबर इन्डिया लिमिटेडको ९७.०५ प्रतिशत लगान्ी रहेको छ । बाँकी लगानी नेपाली लगानीकर्ताको रहेको छ ।

नेपालको निर्यात बढी गर्ने उद्योगमा डाबर नेपाल प्रालि पर्छ । वर्षको ८ अर्बभन्दा बढीको निर्यात डाबर नेपालले गर्ने गर्छ । निकासी बढी गर्ने उद्योगबाट सबैभन्दा बढी कर तिरेको भन्दै डाबरलाई सरकारले सम्मान समेत गरेको छ ।

डाबरको वर्षको व्यापार १२ अर्बको जति हुने गरेको छ ।

डाबर नेपालले नेपालमा रियल ब्रान्डमा जुस, हाजमोला, डाबर ब्रान्डमा ग्लुकोज, टूथपेस्ट, मह लगायतका प्रडक्टहरू ३०० भन्दा बढी वितरक तथा १ लाख रिटेलर पोइन्ट बिक्री गर्दै आएको छ ।

कम्पनीले पेय पदार्थ, च्यवनप्राश, ग्लुकोज, टूथपेस्ट, कपालमा लाउने तेल, हाजमोला, मह लगायतका वस्तु निर्यात गर्दै आएको छ । कम्पनी विभिन्न सरकारी निकायहरूद्वारा निर्यात व्यवसायमा उत्कृष्ट करदाता, व्यावसायिक रूपमा महत्त्वपूर्ण व्यक्ति जस्ता पुरस्कारहरूबाट पुरस्कृत भएको छ ।