काठमाडौँ । सिद्धार्थ हस्पिटालिटीको व्यवस्थापनमा सुर्खेतको वीरेन्द्रनगरमा सञ्चालन भइरहेको सिद्धार्थ होटल कर्णाली प्रदेशकै पहिलो चार तारे होटल बनेको छ । पर्यटन विभागले सो होटललाई चार तारेमा वर्गीकरण गरेसँगै प्रदेशकै पहिलो चार तारे होटल बनेको हो ।
विभागले पर्यटन ऐन, २०३५ तथा होटल, लज, रेष्टुराँ, तथा रिसोर्ट, बार तथा पथ प्रदर्शक नियमावली, २०३८ मा व्यवस्था भएअनुसार चार तारा होटलमा स्तर वर्गीकरण गरी यो इजाजतपत्र दिइएको जनाएको छ ।
होटलले यसअघि खाद्य व्यवस्था तथा गुणस्तर विभागबाट अति उत्तम वर्गको समेत वर्गीकरण पाएको थियो । कर्णाली प्रदेशकै सुबिधा सम्पन्न उक्त होटलमा चार स्वीट, ४५ डिलक्स र १५ वटा स्ट्याण्डर्ड प्रकृतिका कोठा छन् भने चार वटा कन्फ्रेन्स हल, छ सयभन्दा बढी क्षमताको ब्यांकवेट हल, पुल बार रेस्टुराँ समेतको सुविधा उपलब्ध छ । साथै फिटनेस क्लव, स्पा, साउना, स्टिम, जीम, स्विमिङ पुल, ब्युटीपार्लरलगायतका सुविधा समेत होटलमा छन् ।
विसं २०७२ देखि सञ्चालनमा आएको यस होटलमा ७० जनाले प्रत्यक्ष रोजगारी पाइरहेको क्षेत्रीय निर्देसक केशब न्यौपानेले जानकारी दिए । २६ वर्ष अघि टिकापुरबाट व्यवसाय सुरू भएको सिद्धार्थ हस्पिटालिटीले हाल लक्जरी रिसोर्ट, पाँच तारे होटल र विभिन्न स्ट्याण्डर्डका होटल तथा क्याफे गरी देशैभर सेवा बिस्तार गरिरहेको छ ।
पूर्वमा विर्तामोडदेखि पश्चिममा महेन्द्रनगरसम्म फैलिएको यस हस्पिटालिटीको सेवामा कूल दुई हजारभन्दा बढी जनशक्तिलाई प्रत्यक्ष तथा अप्रत्यक्ष रुपमा रोजगारी पाएका छन् ।
प्रतिक्रिया दिनुहोस्