काठमाडौं । सम्पत्ति विवरण गोप्य राखेर आलोचना खेपेको सरकारले यसलाई सार्वजनिक गरेको छ ।
प्रधानमन्त्री पुष्पकमल दाहाल ‘प्रचण्ड’ले चारपटक विश्वासको मत लिएपछि सम्पत्ति विवरण प्रधानमन्त्री तथा मन्त्रिपरिषदको कार्यालयको वेबसाइटमा सार्वजनिक गरेका हुन् ।
सम्पत्ति विवरणअनुसार सबैभन्दा धनी मन्त्रीमा भौतिक योजना तथा निर्माणमन्त्री रघुबीर महासेठ देखिएका छन् । उपप्रधान एवं भौतिक पूर्वाधार तथा यातायात मन्त्री रघुबीर महासेठको सम्पत्ति ९ बिघाभन्दा बढी जग्गा, २ करोड २५ लाख रुपैयाँ नगद, ४३ तोला सुन र विभिन्न बैंकमा साढे ३ करोड रुपैयाँको सेयर रहेको छ । महासेठको जनकपुर र काठमाडौंमा घर रहेको छ ।
जनकपुरका ३ कठ्ठा क्षेत्रफलमा फैलिएको साढे २ तले घर रहेको छ । महासेठले २०५५ सालमा खरिद गरेको उक्त घर जुलिकुमारी महत्तोको नाममा रहेको छ । महत्तोकै नाममा ललितपुरमा २ रोपनी १३ अनामा २०५६ सालमा जग्गा खरिद गरेर बनाएको साढे २ तले अर्को पनि छ । महासेठले श्रीमतीको नाममा धनुषामा ७ बिघा ३ कठ्ठा, सिन्धुलीमा ४ कठ्ठा, ललितपुरमा १ रोपनी ७ आना, धनुषामै ३ कठ्ठा जग्गा किनेका छन् । महासेठको नाममा १ बिघा १५ कठ्ठा जग्गा छ । सम्पत्ति विवरणअनुसार प्रधानमन्त्री प्रचण्डले आफूसँग बैंकमा नगद २५ लाख रुपैयाँ रहेको उल्लेख गरेका छन् ।
प्रतिनिधिसभा सदस्यको हैसियतमा पाएको २५ लाख रुपैयाँ एभरेस्ट बैंकमा रहेको प्रचण्डले देखाएका छन् । यस्तै सीता दाहालको नाममा चितवनको भरतपुर १४ मा १४ कट्ठा जग्गा रहेको, सीताकै नाममा भरतपुर १२ मा १ कट्ठा अंशबाट प्राप्त भएको उनले जनाएका छन् ।
गृहमन्त्री रवि लामिछानेको हाल काठमाडौं महानगरपालिका वडा नम्बर ६ स्थायी घर भएका गृहमन्त्री लामिछानेले भक्तपुरमा १ रोपनी १ आना पैतृक सम्पत्ति देखाएका छन् । यस्तै ग्लोबल आइएमई बैंकमा ५ हजार रुपैयाँ, नेपाल बैंकमा १ लाख ५ हजार रुपैयाँ मात्र लामिछानेले आफ्नो सम्पत्ति देखाएका छन् ।
यस्तै, श्रीमती निकिता पौडेलको माइतीको संगोलमा १० रोपनी जग्गा, ८० तोला सुन, २० केजी चाँदी, गोपीकृष्ण सेन्ट्रल कम्प्लेक्समा २५ प्रतिशत सेयर रहेको उल्लेख गरेका छन् । यस्तै घर किन्न १ करोड ५० लाख ऋण रहेको उल्लेख छ ।
यस्तै श्रीमती र आफ्नो आयबाट ४२ लाखको टाटा नेक्सन इभी कार रहेको सम्पत्ति विवरण पेस गरेका छन् । अर्थमन्त्री वर्षमान पुनसँग बैंक खातामा ३३ लाख ७० हजार रहेको छ । पैतृक सम्पत्ति रोल्पामा रहेको छ । शिक्षामन्त्री सुमना श्रेष्ठसँग घर नभएपछि करोडभन्दा बढी रकम बैंकमा निक्षेप र सुन चाँदी र गहना देखिएको छ । संस्कृति, पर्यटन तथा नागरिक उड्डयनमन्त्री हितबहादुर तामाङसँग ४ ठाउँमा जग्गा रहेको छ ।
मन्त्री तामाङको नाममा नुवाकोटको पञ्चकन्यामा ७ रोपनी १५ आना हाराहारीमा जग्गा छ । यस्तै शिवमाया तामाङको नाममा पनि नुवाकोटमा २ ठाउँ र काठमाडौंको टोखामा एक ठाउँमा जग्गा रहेको उल्लेख छ । यस्तै, ७–८ तोला चाँदी, ७ लाख सुन र केही नगद चल सम्पत्तिको रूपमा रहेको उनले उल्लेख गरेका छन् । यसबाहेक तलब भत्ताबाट प्राप्त ७ लाख ५० हजार रुपैयाँ बैंकमा रहेको पनि उनले उल्लेख गरेका छन् ।
प्रतिक्रिया दिनुहोस्