विराटनगर । उद्योग संगठन मोरङले राष्ट्रिय तथा अन्तर्राष्ट्रिय क्षेत्रमा विद्यमान गुणस्तर प्रमाणिकरण मापदण्डहरुलाई आधार वनाइ स्थानीय उद्योग व्यवसाय सुहाउँदो क्युसेफ गुणस्तर प्रणाली प्रारम्भ गरेको छ । गत साता सम्पन्न उद्योग संगठन मोरङको ५१औं वार्षिक साधारण सभाको समुद्घाटन समारोहका अवसरमा कोशी प्रदेशका मुख्यमन्त्री हिकमत कार्कीले क्युसेफको लोगो अनावरण गर्दै शुभारम्भ गरेका हुन् ।

क्युसेफलाई स्वतन्त्र मानक प्रमाणीकरणको रुपमा स्थापित गर्न तथा प्राविधिकरुपमा यसलाई कार्यान्वयनमा ल्याउन संगठनले राष्ट्रिय प्रमाणिकरण तथा व्यवस्थापन प्रालिसँग सहकार्य गरेको छ । सोही असवरमा संगठनका अध्यक्ष राकेश सुराना र नेशनल सर्टिफिकेसन एण्ड म्यानेजमेन्ट प्रालिका अध्यक्ष जनार्दन घिमिरेले उक्त प्रणाली कार्यान्वयनमा ल्याउन एक सम्झौता पत्रमा हस्ताक्षर गरेका छन् ।

गुणस्तर मापदण्डका असल अभ्यासहरुलाई प्रवर्धन गर्न स्थानीय उद्योग व्यवसायको स्थानीय परिवेशमा असल उत्पादनको बेञ्चमार्क तयार गर्ने र सो अनुरुप पालनाका लागि क्षमता अभिवृद्धि गर्ने उद्देश्ले संगठनले क्युसेफ गुणस्तर मापदण्ड प्रणालीको सुुरुवात गरेको अध्यक्ष राकेश सुरानाले वताएका छन । उनले क्युसेफ एक स्वेच्छिक र स्वतन्त्र गुणस्तर प्रमाणिकरण प्रणालीको मानक भएको स्पष्ट पारे ।

संगठनको असल उत्पादनका अभ्यास प्रबर्द्धन समितिका संयोजक श्री बिरेन्द्र राठीले यो प्रणालीले स्थानीय उद्योगले अपनाएको कार्यप्रणाली, सामाजिक, वातावरणीय, कामदारको कल्याण, स्वास्थ्य, सुरक्षासम्बन्धी स्थापित मान्यताहरुका आधारमा स्वतन्त्र एवं प्रमाणित अडिटरहरुले अडिट गरेपश्चात प्रमाणिकरण गरि प्रमाण पत्र प्रदान गर्ने वताए ।

नेशनल सर्टिफिकेसन एण्ड म्यानेजमेन्ट प्रालिका अध्यक्ष जर्नादन घिमिरेले क्यूसेफ मापदण्ड आईएसओ ९००१, १४००१, ४५००१, २२००० र ह्यास्याप. लगायतका ४ वटा छुट्टाछुट्टै गुणस्तर मानक मापदण्ड प्रणालीको आधार तयार गर्ने एउटा समग्र गुणस्तरको प्याकेज भएको बताउदै क्यूसेफ प्रमाणीकरण भएका जुनसुकै उद्योग प्रतिष्ठानले उक्त ४ वटा अन्तर्राष्ट्रिय मापदण्डका लागि तत्काल आवेदन दिई प्राप्त गर्न सक्ने जनाएकाछन ।

क्युसेफ मापदण्ड प्रमाणली साना, मझौला, ठूला सबै प्रकारका उद्योग प्रतिष्ठानहरुले प्रयोग गर्न सक्ने र यस प्रणालीले उत्पादन प्रकृया, वस्तुको गुणस्तरमा सुधार, कार्यस्थल व्यवस्थापन, मानव संशाधन व्यवस्थापन, वातावरण तथा सामाजिक प्रतिष्ठामा अभिवृद्धि गर्नुका साथै राष्ट्रिय तथा अन्तर्राष्ट्रिय कानुनले निर्धारण गरेका मापदण्ड, अनुपालना लगायतका विषयमा जानकारी प्रदान गरी सोही अनुरुपको मापदण्ड तयार गरी अन्तर्राष्ट्रिय बजारमा प्रवेश गर्ने उद्योगहरुलाई विश्वव्यापी भ्यालुचेनमा प्रतिस्पर्धी बनाउन मद्दत पु¥याउने संगठनले जनाएको छ ।

साथै, नेपाल सरकारले निर्धारणगरेका अनुपालनाहरु, उद्योग व्यवसायको प्रकृति अनुसारका कानुनी प्रावधानहरु वारे सुसूचित गरी जरिवाना, जोखिमहरुबाट वचाउनुका साथै राज्यले निर्धारण गरेका कानुनहरुको परिपालन गरी बजारमा प्रतिस्पर्धी, उपभोक्ताको विश्वास जित्नसक्ने, सामाजिक प्रतिष्ठा अभिवृद्धिका साथै ब्यवसाय सञ्चालनमा सहजता ल्याउने जनाइएको छ ।

सःशुल्क व्यावसायिक विकासको सेवाका रुपमा संगठनले प्रारम्भ गरेको व्यवस्थापन मापदण्ड प्रणाली नेपालमा नीजि क्षेत्रबाट सञ्चालनमा ल्याउन लागिएको पहिलो मापदण्ड हो । संगठन सचिवालयमा सम्पर्क राखी यो सेवा प्राप्त गर्न सकिने संगठनले जनाएको छ ।