एजेन्सी । मुम्बईको छत्रपति शिवाजी महाराज अन्तर्राष्ट्रिय विमानस्थलमा इथियोपियन एयरलाइन्सको विमानमा आगलागी भएको छ । जानकारी अनुसार जब इथियोपियन एयरलाइन्समा रसायनले भरिएको पार्सल लोड गरिँदै थियो, त्यस क्रममा आगलागी भएको हो । भाग्यले यस घटनामा कुनै पनि प्रकारको क्षति भएको छैन ।

प्राप्त जानकारी अनुसार शुक्रबार बिहान मुम्बई विमानस्थलमा इथियोपियन एयरलाइन्समा रसायनले भरिएको पार्सल लोड गरिँदा आगलागी भएको हो । पुलिसले यस प्रकरणमा पाँच जनालाई पक्राउ गरेको बताएको छ ।

सहार पुलिस थानाका एक अधिकारीले बताए अनुसार, पश्चिम बंगालको नडियाल निवासी समीर नारायणचन्द्र विश्वास (३१) लाई नन्दन दिनेश यादव (२६), सुरेश सुब्बा सिंह (४६), विश्वनाथ बालसुब्रमण्यम सेनजुन्धर (३७) र अखिलेश गजराज यादव (३७) संगै पक्राउ गरिएको छ ।

शुक्रबार बिहान करिब साढे दस बजे जब विमानमा सामान लोड गरिँदै थियो, एउटा झोलाबाट धुवाँ निस्केको देखियो । जसले चाँडै आगो समात्यो, तर तत्कालै निभाइयो । पक्राउ परेका समीरले कसैले उक्त झोला आफूलाई दिएको र उक्त झोला कंगोमा कसैलाई बुझाउनुपर्ने थियो ।

अधिकारीका अनुसार झोलामा १० किलोग्राम ज्वलनशील पदार्थ थियो । जसमा आधा तरल र आधा पाउडरको रूपमा थियो । सत्यतथ्य पत्ता लगाउन फरेन्सिक ल्याव पठाइएको जनाइएको छ ।