काठमाडौं । नेपाली विद्यार्थीहरु विदेश पढ्न जाँदा साथमा सवा खर्ब रुपैयाँ बराबरको विदेशी मुद्रा लगेका छन् । गत आर्थिक वर्षमा विद्यार्थीहरु विदेश पढ्न जाँदा विदेशी मुद्राको ढुकुटीबाट १ खर्ब २५ अर्ब रुपैयाँ खर्च भएको हो ।

नेपाली विद्यार्थीहरुका लागि युरोपेली तथा अमेरिकी देश र अस्ट्रेलिया तथा जापान जस्ता शैक्षिक गन्तव्य रोजाइ बन्ने गरेको छ । ती देश जाने क्रममा विद्यार्थीहरुले साथमा १ खर्ब २५ अर्ब १३ करोड रुपैयाँ खर्च भएको हो । यसरी अध्ययनका लागि विदेसिन विद्यार्थीका कारण गत वर्ष डलर ढुकुटीमा १ खर्ब रुपैयाँको प्रभाव परेको थियो ।

शिक्षतर्फको भ्रमण व्यय बढ्दा शोधनान्तर स्थितिमा सेवा खाता अन्तर्गत भ्रमण व्यय ३१.१ प्रतिशतले बढेको छ । विदेश घुम्न जानेले १ वर्षमा कुल १ खर्ब ८९ अर्ब ४३ करोड रुपैयाँ खर्च गरेका हुन् । अघिल्लो वर्ष भ्रमण व्यय १ खर्ब ४४ अर्ब ५२ करोड थियो ।

आर्थिक वर्ष २०८०÷८१ मा खुद सेवा आय ५५ अर्ब ८६ करोड रुपैयाँले घाटामा रहेको छ । अघिल्लो वर्ष खुद सेवा आय ७९ अर्ब ८९ करोडले घाटामा रहेको थियो । समीक्षा वर्षमा सेवा खाता अन्तर्गत भ्रमण आय ३२.१ प्रतिशतले वृद्धि भई ८२ अर्ब ३३ करोड रुपैयाँ पुगेको छ । अघिल्लो वर्ष यस्तो आय ६२ अर्ब ३० करोड रुपैयाँ रहेको थियो ।