नवलपरासी । यहाँस्थित पृथ्वीचन्द्र अस्पतालका निमित्त मेडिकल सुपरिटेन्डेट (मेसु) डा मोहम्मद नुरुल होदाले स्वास्थ्य तथा जनसङ्ख्यामन्त्री प्रदीप पौडेलसँग स्वास्थ्य उपकरणको माग गरेका छन् ।

बर्दघाटस्थित ट्रमा सेन्टरको शिलान्यास कार्यक्रममा आएका स्वास्थ्यमन्त्री पौडेलले जिल्ला अस्पतालको अवलोकन तथा निरीक्षण गरेका थिए । निरीक्षणको क्रममा अस्पतालका मेसु डा होदाले चार स्वास्थ्य उपकरणको माग गरेका हुन् । अस्पतालमा स्वास्थ्यसम्बन्धी उपकरणको अभाव छ । अस्पतालमा आवश्यक चिकित्सक जनशक्ति उपलब्ध भए पनि उपकरणको अभावमा सेवा दिन नसकिएको डा होदाको गुनासो छ ।

उनले भने, ‘अस्पतालका लागि चार उपकरण माग गरिएको छ । अर्थोपेडिक (हाडजोर्नी शल्यक्रिया) का लागि सि–आमन, जेनरल एनेस्थेसिया, लेप्रोस्कोपी शल्यक्रिया र कान शल्यक्रिया उपकरण गरी चार उपकरण माग गरिएको छ ।’ अस्पतालमा अर्थोपेडिकको उपकरण भए पनि पुरानो भएकाले अर्को माग गरिएको, उनले बताए ।

अस्पतालको नयाँ भवनबाट सेवा प्रभावकारी बनाउन उपकरण आवश्यक रहेको उनको भनाइ छ । उनका अनुसार आकस्मिक शल्यक्रिया (इमर्जेन्सी ओटी) र अतिरिक्त शल्यक्रिया (सिडियोल ओटी) को सेवा सञ्चालनको तयारी भइरहेको छ ।

अस्पतालको २४ घण्टा सेवा थप प्रभावकारी बनाउन आवश्यक तयारीमा जुटेको अस्पताल व्यवस्थापन समितिका अध्यक्ष महेन्द्र गुप्ताले बताए । अस्पतालमा अहिले अर्थोपेडिक सर्जन, जनरल सर्जन र इएनटी सर्जनलगायत चिकित्सक रहेको अस्पतालले जनाएको छ । पछिल्लो समय थप सेवासहित व्यवस्थापन पक्ष सुधार भएकाले अस्पतालमा बिरामीको सङ्ख्यामा वृद्धि भएको छ ।