काठमाडौं । पछिल्लो समय साधारण सेयर निष्काशन नभएको लामो समय भइसक्यो । लामोसमयदेखि आईपीओ जारी नहुँदा डिम्याट खाता निष्क्रिय हुन थालेका छन् । नेपाल इन्फास्टक्चर बैंकको आईपीओ जारी गर्ने सयममा धेरै व्यक्तिहरुले डिम्याट खाता खोलेका थिए ।

त्यसपछि लगातार रुपमा आईपीओ आउँदा डिम्याट खाता सक्रिय नै रहेका थिए । तर, पछिल्लो समय आईपीओ जारी हुने नसकेपछि डिम्याट खाता निष्कृय देखिएका हुन । सीडीएस एन्ड क्लियरिङ (सीडीएससी)का अनुसार अनुसार तीन वर्ष अघि डिम्याट खाता खोल्नेको संख्या ६४ लाख पुगेको थियो । त्यो समयमा एकै पटक ४८ लाख बाट बढेर ६४ लाख पुगेको थियो । तर, अहिले आईपीओ, एफपिओ आउन छोडेपछि खाता निष्कृय हुन थालेका हुन् ।

हरेक आर्थिक वर्ष प्रतिव्यक्ति १ सय रुपैयाँ शुल्क तिरेर डिम्याट खाता नवीकरण गर्नुपर्ने व्यवस्था छ । पछिल्लो एक वर्षदेखि कुनै पनि कम्पनीको आईपीओ जारी हुन सकेको छैन् । जसले गर्दा सर्वसाधारण डिम्याट खाता नवीकरणमा पनि चासो दिन छाडेका छन् ।

सीडीएस एन्ड क्लियरिङको पछिल्लो तथ्यांकअनुसार डिम्याट खाता खोल्नेको संख्या ६४ लाख ३३ हजार १ सय ९९ छ । तर, तीमध्ये सक्रिय प्रयोगकर्ता संख्या ३६ लाख ५८ हजार ४ सय ६६ मात्रै छन् । यसलाई आधार मान्दा करिब २७ लाख ७४ हजार खाता निष्क्रिय अवस्थामा रहेको देखिन्छ ।

खोलिएको खातामध्ये ४३ प्रतिशत निष्क्रिय छ । जसले डिम्याट खाता नवीकरण गरेका हुन्छ उसले मात्रै मेरो सेयर चलाउन पाउने भएकाले मेरो सेयर नचलाउनेको डिम्याट खाता निष्क्रिय रहेको मान्न सकिने सीडीएस एन्ड क्लियरिङका प्रवक्ता सुरेश न्यौपानेको भनाइ छ ।

अहिले डिम्याट खाता नवीकरण नभए पनि पछि चाहेका बेला एकैपटक नवीकरण गर्न पनि सकिने प्रवक्ता न्यौपानेको भनाइ छ।