काठमाडौं । कुनै समय एक खर्ब बराबरको निर्यात भएको बनस्पती तेलको निर्यातको सम्भावना पुनः बढेको छ ।

भारत सरकारले बनस्पती तेलको कच्चा पदार्थको आयातमा भन्सार शुल्क बढाएको थियो । नेपालले कच्चा पदार्थ आयात गरेर तयारी तेल भारतमा निर्यात गर्न पाउने सुविधा छ । भारतले गरेको नीतिगत परिवर्तनसँगै उद्योगीले पाम आयल,भटमासको तेल निर्यात गर्न कच्चा पदार्थ आयात गर्न एलसी खोलेका छन् ।

बैंकरका अनुसार पछिल्लो महिना उद्योगीले खोलेको सबैभन्दा बढी एलसी बनस्पती घिउको आयातको लागि छ । ‘भारतमा निर्यातको सम्भावना बढेपछि बनस्पती घिउ उद्योगबाट कच्चा पदार्थ आयातको लागि एलसी खोल्ने क्रम बढेको छ,’माछापुच्छ्रे बैंकका प्रमुख कार्यकारी अधिकृत सन्तोष कोइरालाले भने ।

भारतले गतवर्ष लोकसभा निर्वाचन अगाडिदेखि बनस्पती तेलको आयातको कच्चा पदार्थको भन्सार शुल्क घटाएको थियो । जसको कारण नेपालबाट तयारी भएर जाने बनस्पती तेलको निर्यातमा असर परेको थियो । चालु आर्थिक वर्षको तीन महिनामा पाम आयलको निर्यातको ७५ प्रतिशतले घटेको छ । आर्थिक वर्ष २०७९÷८० मा पाम,भट्मास गरेर करिब १ खर्बको तेल भारत निकासी भएको थियो । एक दर्जनभन्दा बढी उद्योगले तेस्रो मुलुकबाट कच्चा पदार्थ आयात गरेर भारत निकासी गर्ने गरेका छन् । साफ्टा अन्तर्गत नेपालबाट निकासी हुने खाने तेलमा भन्सार शुल्क कम लाग्ने गरेको छ ।

भारतमा बजारको सम्भावना देखेपछि २ वर्ष अगाडि सञ्चालनमा रहेका तथा अन्य उद्योगीले पानि खाने तेल उद्योगमा लगानी गरेका थिए ।