एजेन्सी । शुक्रबार साँझ जर्मनीको मैगडेबर्ग शहरमा रहेको क्रिसमस बजारमा एक कारले ठक्कर दिँदा पाँच जनाको मृत्यु भयो भने २०० भन्दा बढी घाइते भए । मृत्यु हुनेमा नौ वर्षको एक बालक र ७५ वर्षकी एक वृद्ध महिला पनि परेका छन् ।
यस घटनामा ५० वर्षीय एक व्यक्तिलाई नियन्त्रणमा लिइएको छ । प्रहरीले भनाइअनुसार ती व्यक्तिले एक्लै यो घटना घटाएका हुन् । शुक्रबार भीडभाड भएको क्रिसमस बजारमा ती व्यक्तिले बीएमडब्ल्यू कारलाई मानिसहरूको समूहमा चलाएको प्रारम्भिक विवरणमा खुलाइएको छ ।
उक्त घटनाले जर्मनीलाई शोकाकुल बनाएको छ भने आप्रवासन र सुरक्षा नीतिहरूबारे बहसलाई पुनः तातो बनाएको छ । घटनास्थलमा मानिसहरूले मैनबत्ती बाल्दै र फूल अर्पण गर्दै शोक प्रकट गरिरहेका छन्। स्थानीय आपतकालीन मनोवैज्ञानिक परामर्शदाता कोरिना पागेल्सजस्ता विशेषज्ञहरू प्रभावितहरूलाई सहयोग गरिरहेका छन् ।
यस घटनाले २०१६ को बर्लिन क्रिसमस बजार आक्रमणको सम्झना गराएको छ, तर यो फरक छ किनभने यो आक्रमण इस्लामपन्थी कट्टरपन्थीको सट्टा इस्लाम विरोधी व्यक्तिले गरेको बताइएको छ ।
आरोपी आफैं आप्रवासन विरोधी भए पनि यस घटनाले जर्मनीमा बढ्दो आप्रवासन विरोधी भावना झनै बलियो बनाएको छ । सुरक्षा, आप्रवासन, र समाजमा ध्रुवीकरणको मुद्दालाई लिएर राजनीतिक दलहरूले आ–आफ्ना एजेन्डा अघि सारिरहेका छन् । घटनाको थप अनुसन्धान भइरहेकै बेला, म्यागडेबर्गको समुदाय शोकमा डुबेको छ भने जर्मनीले सुरक्षा र समाजिक समायोजनको जटिल प्रश्नहरूको सामना गरिरहेको छ ।
घटना कसरी भयो ?
शुक्रबार साँझ करिब ७ बजेर २ मिनेट जाँदा आपतकालीन सेवामा सहयोगका लागि फोन आएको थियो। फोन गर्ने व्यक्तिले शहरको मध्यभागमा रहेको क्रिसमस बजारमा कारले भीडलाई ठक्कर दिएको जानकारी दिएका थिए । प्रहरीले शुरूमा यो एक दुर्घटना हुनसक्ने बताए पनि थप अनुसन्धानपछि यो घटना नियोजित भएको प्रष्ट भएको थियो ।
चालकले ट्राफिक लाइटको संकेत पर्खेर बन्द हुने बित्तिकै पैदलयात्रीको लागि छुट्टाइएको बाटोमा कार चलाएका थिए । त्यस बाटो हुँदै उनी बजारको मुख्य प्रवेशद्वारमा पुगे, जुन आपतकालीन गाडीका लागि छुट्टाइएको थियो । कार, बजार प्रवेश गर्ने क्रममा बाटोमा रहेका धेरै मानिसलाई ठक्कर दिँदै अघि बढेको थियो ।
प्रत्यक्षदर्शीहरूको भनाइ
घटनास्थलका प्रत्यक्षदर्शीहरूले कार तीव्र गतिमा पैदलयात्रीको क्षेत्रमा प्रवेश गरेको बताएका छन् । मानिसहरू बच्नका लागि कुदेर, झुकेर वा छिपेर कारको बाटोबाट हटेको बताइएको छ ।
ती चालकले त्यसपछि फेरि सडकमा फर्कन खोजेका थिए । तर, घटनास्थलमा पहिल्यै तैनाथ प्रहरी अधिकारीहरूले उनलाई ट्राफिक लाइटमा रोक्न सफल भएका थिए ।
सशस्त्र प्रहरीहरूले ती व्यक्तिलाई तत्काल नियन्त्रणमा लिए । भिडियो फुटेजमा ती चालकलाई भुइँमा लडाएको अवस्थामा देख्न सकिन्छ । नियन्त्रणमा लिइएको बीएमडब्ल्यू कारको अगाडिको बम्पर निकै क्षतिग्रस्त भएको र सिसा फुटेको देखिएको छ । प्रहरीका अनुसार यो सम्पूर्ण घटना केवल तीन मिनेटभित्र सम्पन्न भएको थियो ।
को हुन् पीडितहरू ?
यो दुर्घटनामा हालसम्म पाँच जनाको मृत्यु भएको पुष्टि गरिएको छ । मृतकहरूमा चार महिला र नौ वर्षको बालक छन्। महिलाहरूको उमेर क्रमशः ४५, ५२, ६७, र ७५ वर्ष रहेको छ । घटनामा २०० भन्दा बढी व्यक्ति घाइते भएका छन् । तीमध्ये कम्तिमा ४१ जनाको अवस्था गम्भीर रहेको अधिकारीहरूले जनाएका छन् । प्रारम्भिक जानकारीअनुसार, मृतक तथा घाइतेहरूको पहिचान हालसम्म सार्वजनिक गरिएको छैन ।
को हुन् सन्दिग्ध ?
स्थानीय सञ्चारमाध्यमका अनुसार सन्दिग्धको नाम तालिब अल–अब्दुलमोहसिन हो । उनी ५० वर्षीय व्यक्ति हुन्, जसको जन्म साउदी अरेबियामा भएको थियो । उनी मनोचिकित्सक हुन् र मैगडेबर्गबाट करिब ४० किलोमिटर टाढा बर्नबर्गमा बसोबास गर्थे । सन् २०२० देखि उनी त्यहाँ मनोचिकित्सकको रूपमा काम गर्दै आएका थिए । अधिकारका अनुसार, तालिब सन् २००६ मा जर्मनी आएका थिए र सन् २०१६ मा शरणार्थीको रूपमा पहिचान पाएका थिए ।
तालिब इस्लामको कडा आलोचक मानिन्छन् । उनी सामाजिक सञ्जालमा खुलेर आफ्नो धारणा राख्थे । उनले जर्मनीको धुर दक्षिणपन्थी राजनीतिक पार्टी ‘अल्टरनेटिभ फर जर्मनी’ (एएफडी) का नेताहरूको विचारलाई समर्थन गर्दै पोस्टहरू सेयर गर्ने गर्थे । उनले इस्लामोफोबिक धारणालाई पनि सामाजिक सञ्जालमा अघि सारेका थिए ।
मैगडेबर्गका प्रहरी प्रमुख टम–अलिभर लैङहन्सले एक वर्षअघि तालिबलाई सम्भावित खतराका रूपमा मूल्यांकन गरिएको जानकारी दिएका छन् ।
अनुसन्धान जारी
जर्मनीका गृहमन्त्री नैन्सी फेसरले यो घटना इस्लामोफोबिक मानसिकता प्रेरित हुनसक्ने बताएका छन्। अनुसन्धान टोलीले घटनाको विस्तृत विवरण संकलन गरिरहेको छ ।
गृहमन्त्रीले घटनाका सम्बन्धमा प्रहरीले सन्दिग्धका बारेमा पहिले नै गरेको अनुसन्धानका विवरणहरू अध्ययन गरिने र आवश्यक कारबाही गरिने बताएका छन् । घटनापछि क्रिसमस बजार बन्द गरिएको छ र सुरक्षामा कडाइ गरिएको छ ।
प्रतिक्रिया दिनुहोस्