काठमाडौं । जनवरी २०२५ देखि पाँचतारे होटल ‘द म्यासिफ’ सञ्चालनमा आउने भएको छ । गुण ग्रुपले निर्माण गरेको उक्त होटलको उद्घाटान ललितपुर महानगरपालिकाका मेयर चिरीबाबु महर्जन र संस्कृति पर्यटन तथा नागरिक उड्डयनमन्त्री बद्री पाण्डेले गर्ने छन् ।

ललितपुरको ग्वार्कोमा निर्माण भइरहेको उक्त होटल जनवरी सञ्चालनमा ल्याउने तयारीका साथ काम भइरहेको बताइएको छ । होटल म्यासिफको व्यवस्थापनसम्बन्धी सम्झौता हुने भएको हो । सम्झौता जनवरी १ मा हुने निश्चित भएको छ।

युरोपकै दोस्रो ठूलो तथा विश्वबजारमा ११ वटा विभिन्न ब्राण्डसहित फैलिएको लुभ्र होटल्स ग्रुपको लक्जरी पाँचतारे होटल ब्राण्ड रोयल टुलिपका तर्फबाट लुभ्र होटल्स भारतका निर्देशक अजय बकाया र द म्यासिफ होटलका कार्यकारी अध्यक्ष राजेन्द्र शाक्यले सम्झौतामा हस्ताक्षर गर्नेछन् ।

हाउजिङ, सपिङ मल, एयरलाइन्स, मिडिया उद्योग क्षेत्रमा लगानी विस्तार गरिरहेको यो समूहको होटल पहिलो हो । ६ अर्ब ५१ करोड रुपैयाँभन्दा बढी लगानीमा निर्माण भइरहेको होटलमा ३०२ कोठा रहेका छन् । होटलमा प्रेसिडेण्टल, सुइट, डिलक्स र स्ट्यान्डर्ड लेभलका कोठा रहनेछन्। हरेक कोठामा नेपालीपनसँगै लक्जरी हुनेछ ।

१६ रोपनी क्षेत्रफलमा फैलिएको होटल त्रिभुवन अन्तर्राष्ट्रिय विमानस्थलबाट भने नजिक र काठमाडौं उपत्यकाको चक्रपथ छेउमा अवस्थित छ । सन् २०१८ अगष्टदेखि सुरु भएको होटल निर्माणको काम कोरोना महामारीलगायतका कारण निर्माणमा ढिलाइ भएको थियो ।