एजेन्सी । विद्युतीय सवारी टेस्लाको बिक्रीमा एक दशकभन्दा बढी समयपछि पहिलो पटक गिरावट आएको छ । यसको प्रमुख कारण बलिया प्रतिस्पर्धी भएको जनाइएको छ ।
डलर अर्बपति एलन मस्कको कम्पनीले गत वर्ष करिब १७ लाख ९० हजार टेस्ला वितरण गरेको थियो । जुन सन् २०२३ मा वितरण भएका १८ लाख गाडीको तुलनामा करिब एक प्रतिशतले कम हो ।
ग्राहकलाई आकर्षित गर्न र विश्वकै ठूला विद्युतीय गाडी निर्माता (ईभी)को स्थान कायम राख्न कम्पनीले बारम्बार मूल्य घटाएको भए पनि यो गिरावट आएको हो ।
यद्यपि, चीनको बीवाईडीले २०२४ मा १७ लाख ६० हजार ईभी बिक्री गर्दै टेस्लासँगको दूरी कम गर्दै लगेको देखिन्छ । शेन्जेनस्थित कम्पनीको कुल गाडी बिक्री २०२४ मा ४१ प्रतिशतले बढेर ४२ लाख नाघेको छ ।
बीवाईडीले ९० प्रतिशत गाडी चीनमै बिक्री गर्छ । जहाँ उसले भोक्सवागन र टोयोटाजस्ता विदेशी ब्रान्डहरूमाथि अग्रता बढाइरहेको छ ।
चीनको घरेलु बजारमा गाडी बिक्रीमा वृद्धिले फाइदा पुर्याएको छ, जसमा तीव्र प्रतिस्पर्धाले मूल्य घटाएको र सरकारले पुराना गाडीलाई ईभी वा अन्य ईन्धन–किफायती विकल्पले प्रतिस्थापन गर्न प्रोत्साहन दिएको छ ।
चीन टेस्लाका लागि पनि प्रमुख बजार हो, तर मूल्य युद्धले प्रतिस्पर्धीहरूसँग बजार गुमाएको छ । अमेरिका र युरोपजस्ता क्षेत्रहरूमा विद्युतीय गाडीको माग कम हुनु पनि धेरै कार निर्माताहरूका लागि चुनौती बनेको छ ।
भोक्सवागन, फोर्ड र जनरल मोटर्स जस्ता कम्पनीहरूले बिक्री लक्ष्य कटौती गरेका छन् भने ईभी प्रविधिमा लगानी ढिला गर्ने निर्णय गरेका छन् । विश्लेषकहरूले प्रतिस्पर्धा बढ्नु र ब्रान्डसँग जोडिएको प्रश्नलाई पनि कारणका रूपमा औंल्याएका छन्, खासगरी मस्कको विवादास्पद राजनीतिक संलग्नताका कारण हो भनेका छन् ।
सन् २०२४ को पहिलो छ महिनामा टेस्लाको बिक्री सुस्त रह्यो तर अन्तिमतिर बढ्न थाल्यो । सन् २०२४ को अन्तिम तीन महिनामा यसले ४ लाख ९५ हजार गाडी वितरण गर्यो, जुन वार्षिक रूपमा २ प्रतिशत बढी र त्रैमासिक कीर्तिमान थियो ।
तर, यसको शेयर मूल्य, जुन गत वर्ष ६० प्रतिशत भन्दा बढी बढेको थियो, विश्लेषकहरूले भविष्यवाणी गरेको ५ लाख गाडीको आँकडा पूरा नभएपछि बिहानको व्यापारमा ५ प्रतिशतले घट्यो ।
अक्टोबरमा युरोपेली संघले चिनियाँ ईभी आयातमा ४५.३ प्रतिशत सम्मको शुल्क लागू गर्यो । अमेरिकाले पनि चीनबाट आउने ईभीमा शतप्रतिशत कर लगाएको छ र निर्वाचित राष्ट्रपति डोनाल्ड ट्रम्पले आयातमा थप शुल्क लगाउने अपेक्षा गरिएको छ ।
बीवाईडीले उदीयमान अर्थतन्त्रमा आफ्नो प्रभाव बढाइरहेको छ । तर, गत महिना ब्राजिलमा यसको सबैभन्दा ठूलो विदेशी बजारमा कारखाना निर्माण नै रोकिएको छ ।
प्रतिक्रिया दिनुहोस्