काठमाडौं । चालु आर्थिक वर्षको ६ महिनामा नेपालबाट विदेश निर्यात हुने वस्तुको परिणामा बढेको छ । भन्सार विभागको तथ्यांकअनुसार पुस मसान्तसम्मको अवधिमा नेपालको निर्यात ३१.७८ प्रतिशतले बढेको हो ।

विभागको तथ्यांकअनुसार ६ महिनाको अवधिमा ९८ अर्ब ७८ करोड ९२ लाख रुपैयाँ बराबरको मालसामान निर्यात भएको छ । गत आवको सोही अवधिसम्ममा नेपालबाट ७४ अर्ब ९६ करोड ८० लाख रुपैयाँ बराबरको मालवस्तु निर्यात भएको थियो ।

विभागको तथ्यांक अनुसार पुस मसान्तसम्ममा आयात पनि ७.०६ प्रतिशतले बढेर ८ खर्ब २२ अर्ब ३७ करोड रुपैयाँ पुगेको छ । गत आर्थिक वर्षको सोही अवधिमा नेपालले ७ खर्ब ६८ अर्ब १६ करोड बढीको वस्तु आयत भएको थियो।

चालु आर्थिक वर्षको ६ महिनाको अवधिमा नेपालबाट सबैभन्दा बढी निर्यात हुने वस्तुमा भटमासको तेल रहेको छ । पुस मसान्तसम्मको नेपालबाट सबैभन्दा धेरै १८ अर्ब ९१ करोड रुपैयाँको भटमासको तेल निर्यात भएको छ । गत आवको सोही अवधिमा नेपालबाट ४२ करोड रुपैयाँको भटमासको तेल निर्यात भएको थियो ।

नेपालले अधिक कच्चापदार्थ आयात गरेरै त्यसमा २० प्रतिशत मूल्य अभिवृद्धि अर्थात भ्यालुएड हुने गरी प्रशोधित भटमासको तेल निकासी गर्दै आएको छ । नेपालले यो अवधिमा भटमासको कच्चा तेल आयातका लागि नै २४ अर्ब ३७ करोड रुपैयाँ खर्च गरेको छ ।

प्रशोधित तेलबाहेक नेपालबाट बढी निर्यात हुनेमा कार्पेट र भुँइमा प्रयोग हुने अन्य टेक्सटाइल छ । यसको निर्यात रकम छ महिनामा ५ अर्ब ६१ करोड ४२ लाख रुपैयाँ छ । गत आवको पुस मसान्तसम्मा भने नेपालले ५ अर्ब २३ करोड रुपैयाँ बराबरको कार्पेटलगायत टेक्सटाइल निर्यात भएको थियो । त्यस्तै पुस मसान्तसम्म सूर्यमुखीको प्रशोधित तेल पनि ४ अर्ब ९८ करोड रुपैयाँको निर्यात भएको छ । गत आवमा १५ करोड रुपैयाँको मात्र सूर्यमुखी तेल निर्यात भएको थियो ।

यस्तै, पछिल्लो ६ महिनामा नेपालले ४ अर्ब ५६ करोड ६५ लाख रुपैयाँभन्दा बढीको अलैंची निर्यात भएको छ । गत आवको पुस महिनासम्ममा नेपालले ३ अर्ब ९० करोड ७६ लाख रुपैयाँको अलैंची निर्यात गरेको थियो ।

नेपालबाट धेरै निर्यात हुने वस्तुमा कालो चिया पनि रहेको छ । यो अवधिमा कालो चियाको २ अर्ब ९६ करोड ९२ लाख रुपैयाँको निर्यात भएको छ । गत आवको सोही अवधिमा नेपालबाट २ अर्ब १ करोड रुपैयाँ बराबर कालो चिया निर्यात भएको थियो।

त्यस्तै पुस महिनासम्मको अवधिमा २ अर्ब ७९ करोड २९ लाख रुपैयाँको धागोजन्य वस्तु निर्यात भएको छ । गत आवको सोही अवधिमा २ अर्ब १ करोड रुपैयाँ धागोजन्य वस्तु निर्यात भएको थियो ।

त्यस्तै यो अवधिमा २ अर्ब ४९ करोड ७१ लाख रुपैयाँ बराबरको फेल्ट जन्य वस्तु निर्यात भएको छ । यस्तो वस्तु गत वर्षको ६ महिनामा २ अर्ब ३१ करोड ५० लाख रुपैयाँको निर्यात भएको थियो । त्यस्तै यो अवधिमा नेपालबाट २ अर्ब ४७ करोडको रोल्ड आइरन तथा स्टिल निर्यात भएको छ भने २ अर्ब ३० करोड रुपैयाँ बराबरको जुटको फेब्रिक्स तथा २ अर्ब २६ करोडको धागो र २ अर्ब २१ करोड रुपैयाँभन्दा बढीको जुसजन्य वस्तुको निर्यात भएको छ ।