काठमाडौं । नेपाल विद्युत् प्राधिकरणका तत्कालीन कार्यकारी निर्देशक हितेन्द्रदेव शाक्यको सेवा अवधि आज सोमबारबाट सकिएको छ ।

शाक्य आफ्नो पदावधि नसकिँदै कार्यकारी निर्देशकमा कुलमान घिसिङलाई नियुक्त गरिएपछि न्याय माग्दै सर्वोच्च अदालत पुगेका थिए । पदावधि रहँदासम्म सर्वोच्चबाट उनको मुद्दामा सुनुवाइ नै भएन । यत्तिकैमा कार्यकाल सकिएपछि सोमबार सामाजिक सञ्जाल फेसबुकमार्फत उनले प्राधिकरणका सहकर्मीसँग बिदा लिएका हुन् ।

आफूलाई कानुनविपरीत प्राधिकरणबाट हटाइएको जिकिरसहित शाक्यले सर्वोच्चमा दायर गरेको रिटमा ३१ पटक तारेख धाए । र, ११ पल्ट पेसीमा सुनुवाइ नै भएन ।

‘‘धन्यवाद, बाई बाई । नमरी बाँचे कालले साँचे फेरि भेट होला, तबसम्म बिट मारेँ है त,’ उनले लेखेका छन्, ‘नेपाल विद्युत् प्राधिकरण र सम्पूर्ण सहकर्मी साथीहरू जय होस् ।’