एजेन्सी । भारतीय गाडी निर्माता कम्पनी महिन्द्रा एन्ड महिन्द्रा ग्रुपका अध्यक्ष आनन्द महिन्द्राले आफूहरुको उपस्थिति अबको एक सय वर्षपछि पनि बजारमा उत्तिकै प्रभावकारी रहने बताएका छन् । “हामी पागलको जस्तो काम गर्दैछौं ताकि १०० वर्षपछि पनि हामी रिलेभेन्ट भइरहन सकौँ”, उनले सामाजिक सञ्जालमा एक्समा एउटा टिप्पणको जवाफमा भनेका छन् ।
अमेरिकाको विद्युतीय सवारी निर्माता कम्पनी टेस्ला भारतमा चाँडै प्रवेश गर्ने सम्भावना छ । कम्पनीले यसका लागि प्रक्रिया सुरु गरिसकेको छ । यसको प्रवेशको विषयमा देशभर चर्चा सुरु भएको छ ।
यसै क्रममा, गिरीश अरोड़ा नामक एक एक्स प्रयोगकर्ताले आनन्द महिंद्रासँग टाटा मोटर्सलाई पनि ट्याग गर्दै प्रश्न गरेका थिए, “यदि मस्क आफ्नो कार भारत ल्याए भने तपाईं त्यसबाट आउने प्रतिस्पर्धालाई कसरी सम्हाल्नुहुन्छ ? के तपाईं तयार हुनुहुन्छ ?”
यसको जवाफमा महिन्द्राले भने, “सन् १९९१ मा भारतीय अर्थतन्त्र खुल्ने पछि हामीसँग यस्तै प्रश्नहरू सोधिएको थियो, के तपाईं टाटा, मारुति र अन्य कम्पनीहरूको सामना कसरी गर्नुहुन्छ ? तर हामी अझै पनि अस्तित्वमा छौं र एक शताब्दीपछि पनि रहन र प्रासंगिक रहनको लागि हामी पागलको जस्तो काम गरिरहेका छौं । तपाईं हामीलाई प्रेरणा दिनुहोस्, हामी यो गर्न सफल हुनेछौं ।”
भारतमा टेस्लाको प्रवेशको सम्भावनाबीच, टेस्लाले १७ फेब्रुअरीमा लिंक्डइनमा १३ पदहरूमा भर्ना गरिने घोषणा गरेको छ । यसमा ग्राहक सेवा र ब्याक–एण्ड अपरेसनसँग सम्बन्धित पदहरू समावेश छन् । हालै भारतीय प्रधानमन्त्री नरेन्द्र मोदीको अमेरिका भ्रमणको क्रममा, टेस्लाका सीइओ एलोन मस्कले उनीसँग भेट गरेका थिए ।
टेस्ला र भारतबीच केही समय अघिदेखि वार्ता हुँदै आएको छ, तर टेस्लाले बढी इम्पोर्ट ड्युटीका कारण भारत आउन सकिरहेको छैन । तर अब भारतले ४० हजार डलरभन्दा बढी मूल्यका कारहरूमा इम्पोर्ट ड्युटीलाई ११० प्रतिशतबाट घटाएर ७० प्रतिशतमा ल्याएको छ । यसले टेस्ला जस्ता कारलाई सहज भएको छ ।
मिडिया रिपोट्र्स अनुसार, टेस्ला भारतमा आफ्नो प्लान्ट स्थापना गर्ने तयारीमा छ । कम्पनी अहिले जमीन खोजीमा जुटेको छ । कम्पनीको प्रयास छ कि अटोमोटिव हब भएका प्रदेशहरूमा प्लान्ट स्थापना गरियोस् । महाराष्ट्र, गुजरात र तमिलनाडु यसका प्राथमिकतामा छन् ।
टेस्लाको वर्तमान बजार पूंजी करीब १.१२ ट्रिलियन डलर छ । यसको शेयर मूल्य ३५५.८४ डलर छ । गत १ वर्षमा टेस्लाको शेयरले ८३.६५ प्रतिशतको रिटर्न दिएको छ। त्यस्तै, गत ६ महिनामा कम्पनीको शेयर ५९.७७ प्रतिशतले वृद्धि भएको छ।
अमेरिकन बजारमा अहिले टेस्लाका ६ इलेक्ट्रिक गाडीहरू बिक्री भइरहेका छन ्। तीमध्ये मोडल एस, मोडल ३, मोडल एक्स, मोडल वाई, नयाँ मोडल वाई र साइबर ट्रक समावेश छन् । यसमध्ये मोडल ३ सबैभन्दा सस्तो गाडी हो। अमेरिकामा यसको मूल्य २९,९९० डलर छ । यो गाडी एक पटक पूर्ण चार्ज गरेपछि ५३५ किलोमिटर दूरी तय गर्न सक्छ ।
प्रतिक्रिया दिनुहोस्