काठमाडौं । पछिल्लो समय बैंक तथा वित्तीय संस्थामा निक्षेप संकलन घटेको छ भने कर्जा प्रवाह बढेको छ । नेपाल राष्ट्र बैंकको फागुन ५ गतेसम्मको तथ्यांकअनुसार बैंक तथा वित्तीय संस्थाहरुमा निक्षेप संकलन ४ अर्बले घटेको छ भने कर्जा प्रवाह ३ अर्बले बढेको छ ।

नेपाल राष्ट्र बैंकका अनुसार हाल बैंक तथा वित्तीय संस्थाहरुमा ६७ खर्ब २८ अर्ब रुपैयाँ निक्षेप रहेको छ । यो फागुन ५ गतेको तथ्यांक हो । फागुन २ गतेसम्म यस्तो निक्षेप ६७ खर्ब ३२ अर्ब रुपैयाँ रहेको थियो । उक्त निक्षेप नेपाल राष्ट्र बैंकले पछिल्लोपटक अद्यावधिक गरेको विवरणअनुसार २० वटा वाणिज्य बैंक, क्षेत्रीय र राष्ट्रियस्तरका समेत गरी १७ वटा विकास बैंक र १७ वटा फाइनान्स कम्पनीसहितका ५४ वटा बैंक तथा वित्तीय संस्थाहरूको हो ।

बैंकिङ क्षेत्रमा रहेको कुल निक्षेप रकममध्ये वाणिज्य बैंकहरूमा मात्र ६० खर्ब रुपैयाँ निक्षेप रहेको छ । यो फागनु २ गतेको भन्दा ३ अर्बले कम हो । फागनु २ गतेसम्मा वाणिज्य बैंकहरुमा ६० खर्ब ३ अर्ब रुपैयाँ निपेक्ष रहेको थियो । यसबाहेक विकास बैंक र फाइनान्स कम्पनीहरूको कुल निक्षेप रकम ७ खर्ब २८ अर्ब रुपैयाँ पुगेको छ । यो फागुन २ गतेसम्ममा ७ खर्ब २९ अर्ब रुपैयाँ रहेको थियो ।

बैंक तथा वित्तीय संस्थाहरुले फागुन २ गतेको तुलनामा फागनु ५ गतेसम्म कर्जा प्रवाह ३ अर्बले बढाएका छन् । पछिल्लो तथ्यांकअनुसार बैंक तथा वित्तीय संस्थाहरुले ५४ खर्ब ४२ अर्ब रुपैयाँ कर्जा प्रवाह गरेका छन् ।

फागुन २ गतेसम्म बैंक तथा वित्तीय संस्थाको यस्तो कर्जा प्रवाह ५४ खर्ब ३९ अर्ब रुपैयाँ रहेको थियो । यो अवधिमा वाणिज्य बैंकहरुमार्फत प्रवाह भएको कर्जा ४८ खर्ब ३० अर्ब रुपैयाँ पुगेको छ । यो फागुन २ गतेको भन्दा ३ अर्बले बढी हो । फागुन २ गतेसम्म वाणिज्य बैंकहरुबाट ४८ खर्ब २७ अर्ब रुपैयाँ कर्जा प्रवाह भएको थियो ।

त्यस्तै फागुन ५ गतेसम्मको अध्यावधिक विवरणअनुसार विकास बैंक र फाइनान्स कम्पनीहरूले ६ खर्ब १२ अर्ब रुपैयाँ कर्जा प्रवाह गरेका छन् । फागुन २ गतेसम्म पनि विकास बैंक र फाइनान्स कम्पनीको कर्जा प्रवाह त्यति नै रहेको थियो ।

बैंकिङ क्षेत्रमा हाल कायम रहेको निक्षेप तथा कर्जा अनुपात (सिडी रेसियो) पनि सामान्य बढेको छ । अहिले सिडी रेसियो ७९.५६ प्रतिशत पुगेको छ । यो फागनु २ गतेसम्मको अवधिमा ७९.४८ प्रतिशत रहेको थियो । अहिले अन्तर बैंकिङ ब्याजदर भने फागुन २ गतेको जस्तै ३ प्रतिशत नै रहेको छ ।