एजेन्सी । आइफोन निर्माता कम्पनी एप्पलले सोमबार आगामी चार वर्षमा पाँच सय अर्ब डलर लगानी गर्ने घोषणा गरेको छ । चीनबाट आयात हुने सामानमा लाग्न सक्ने नयाँ ट्यारिफबाट जोगिनका लागि एप्पलले अमेरिकामा लगानी बढाउन लागेको हो । एप्पलका अनुसार, यो लगानीबाट २० हजार नयाँ रोजगारी सिर्जना हुनेछ ।
यस महिनाको सुरुआतमा, अमेरिकी राष्ट्रपति डोनाल्ड ट्रम्पले चीनबाट हुने सबै आयातमा १० प्रतिशत ट्यारिफ घोषणा गरेका थिए । एप्पलले धेरैजसो आईफोनहरू चीनबाट आयात गर्छ एप्पल कम्पनीका सीईओ टिम कुकसँग बिहीबारको बैठकपछि एप्पलले यो लगानी गर्न लागेको ट्रम्पले बताएका थिए ।
“एप्पलले अहिले सयौं अर्ब डलर लगानी गर्न लागिरहेका छन्, यो मेरो ट्यारिफ बढाउने निर्णयले भएको हो, अहिले पनि अमेरिकामा धेरै चिप उत्पादन तथा कार निर्माता कम्पनीहरु आइरहेका छन्”, ट्रम्पले भनेका छन् ।
तर यो लगानी एप्पलको चीन बाहिर आपूर्ति श्रृंखला विस्तार गर्ने पहिलेदेखिकै योजनाको निरन्तरता भएको बताइएको छ । कोभिड–१९ महामारीका बेला चीनमा देखिएको उत्पादन समस्या समाधान गर्न एप्पलले हालैका वर्षहरूमा यस्तो रणनीति अपनाएको उल्लेख गरिएको छ ।
यसअन्तर्गत, एप्पलले टेक्सासमा म्याक प्रो कम्प्युटर उत्पादनको विस्तार गरिसकेको छ । साथै, एप्पललाई चिप आपूर्ति गर्ने टीएसएएमसी कम्पनीले एरिजोनामा नयाँ चिप निर्माण प्लान्ट खोलिसकेको छ । जसलाई बाइडेन प्रशासनले ६.६ अर्ब डलरको सहायता प्रदान गरिएको थियो । यद्यपि, एप्पलले आफ्नो उत्पादन मुख्य रूपमा भारत र भियतनाम जस्ता देशहरूमा विस्तार गरिरहेको छ ।
यस लगानीले एप्पललाई ट्रम्पका नयाँ ट्यारिफहरूबाट जोगिन सहयोग गर्ने अपेक्षा गरिएको छ । यद्यपि, नयाँ सुविधाहरू सञ्चालनमा आउन अझै केही समय लाग्नेछ, र एप्पलको मुख्य उत्पादन विदेशमै भइरहनेछ ।
एप्पलका सीईओ टिम कुकले भने, “हामी अमेरिकी नवप्रवर्तन (इनोभेसन) को भविष्यप्रति आशावादी छौँ । यो ५०० अर्ब अमेरिकी डलरको प्रतिबद्धतासँगै हामी अमेरिकामा लगानी गर्ने आफ्नो लामो परम्परालाई निरन्तरता दिइरहेका छौँ ।”
ट्रम्पले सोमबार बिहान आफ्नो ट्रुथ सोसल पोष्टमा एप्पलको घोषणाको श्रेय आफूले गरेका आर्थिक नीति र ट्यारिफहरूलाई दिए । उनले लेखे, “यसको कारण के हो ? हाम्रो कामप्रति विश्वास। यदि त्यो विश्वास नभएको भए, तिनीहरूले १० सेन्ट पनि लगानी गर्ने थिएनन् ।”
एप्पल आफैंले धेरै उत्पादन नगर्ने भए पनि, कम्पनीले अमेरिकाभर हजारौं उत्पादन साझेदारहरूसँग मिलेर केही उत्पादन अमेरिका भित्रै गर्ने योजना बनाएको छ । यस अन्तर्गत ह्युस्टनमा नयाँ सर्भर उत्पादन केन्द्र स्थापना गरिनेछ, जसले एप्पलको एआई प्रविधिलाई सहयोग गर्नेछ । यो २.५ लाख वर्गफुटको सुविधा सन् २०२६ मा सञ्चालनमा आउनेछ र हजारौं नयाँ रोजगारी सिर्जना गर्नेछ ।
सन् २०२१ मा, बाइडेन राष्ट्रपति बनेको केही सातापछि, एप्पलले पाँच वर्षमा ४३० अर्ब डलर लगानी गर्ने योजना घोषणा गरेको थियो । सन् २०१८ मा, ट्रम्प प्रशासनका बेला, एप्पलले ५ वर्षमा ३५० अर्ब डलर लगानी गर्ने प्रतिवद्धता जनाएको थियो ।
प्रतिक्रिया दिनुहोस्