काठमाडौँ । अमेरिकी राष्ट्रपति डोनाल्ड ट्रम्पले चीनबाट आयात हुने सामानमा थप १० प्रतिशत कर लगाउने चेतावनी दिएका छन् । चीनबाट आयात हुने सामानमा अमेरिका सरकारले १० प्रतिशत कर यसअघि नै लगाउँदै आएको छ ।
साथै ट्रम्पले क्यानडा र मेक्सिकोबाट आयात हुने सामानममा २५ प्रतिशत ट्यारिफ लगाउने यसअघिको घोषणालाई कार्यान्वयनमा ल्याउने समेत घोषणा गरेका छन् । र, यो आगामी मार्च ४ देखि लागू हुने समेत उनले उल्लेख गरेका छन् । उनले यसअघि नै उक्त कर लगाउने घोषणा गरेपनि क्यानडा र मेक्सिकोले सीमा सुरक्षा बढाउने र लागू पदार्थको कारोबारमा कडाइ गर्ने प्रतिबद्धतापछि तत्कालका लागि उक्त ट्यारिफ लागू भएको थिएन ।
ट्रम्पको उक्त घोषणापछि दुवै देशका नेतृत्वहरुले अमेरिकाले उक्त ट्यारिफ लगाए आफूहरुले पनि सोहीअनुसारको नीति लिने बताइसकेका छन् ।
यता अमेरिकास्थित चिनियाँ दूतावासका प्रवक्ता लियु पेन्गयुले आफूहरुले अमेरिकी सरकारसँग यस विषयमा कुरा गरिरहेको बताइसकेका छन् ।
अमेरिकामा गत वर्ष यी तीन देशबाट ४० प्रतिशत सामान आयात भएको थियो । उक्त निर्णय लागू भएमा अमेरिकी उपभोक्ताले मुद्रास्फीतिको सामना गर्नुपर्ने छ । अहिले पनि अमेरिकामा मूल्यवृद्धि भइरहेको छ ।
यसअघिको राष्ट्रपतिको चुनावको सभाहरुमा ट्रम्पले चिनियाँ सामानमा ६० प्रतिशतसम्म ट्यारिफ लगाउने बताएका थिए । त्यहाँका अर्थशास्त्रीहरुले ट्यारिफ बढाउँदाको असर आइफोनदेखि एभाकाडोसम्मको मूल्य उल्लेख्य बढ्ने चेतावनी दिइसकेका छन् ।
ट्रम्पको उक्त घोषणाले अमेरिकाका तीन वटा मुख्य शेयर बजारमा असर देखिएको छ । ट्रम्पको उक्त निर्णयको विरोधमा चीनले पनि कोइराला र कृषिजन्य सामग्रीको आयातमा कर बढाइसकेको छ ।
प्रतिक्रिया दिनुहोस्