काठमाडौं । नेपालमा निर्जीवन बीमाको व्यवसायमा मोटर बीमा र सम्पत्ति बीमाको हिस्सा आधाभन्दा बढिरहेको छ । नेपाल बीमा प्राधिकरणको तथ्यांकअनुसार चालु आर्थिक वर्षमा माघ मसान्तसम्ममा निर्जीवन बीमातर्फ बीमा लेखको आधारमा मोटर बीमा र सम्पत्ति बीमाको हिस्सा कुला व्यवसायको आधाभन्दा बढी रहेको हो ।

प्राधिकरणका अनुसार चालु आर्थिक वर्षको ७ महिनाको अवधिमा निर्जीवन बीमा कम्पनीहरुले कुल २४ अर्ब ७७ करोड ७० लाख रुपैयाँको बीमा शुल्क संकलन गर्दा मोटर र सम्पत्ति बीमाबाट मात्रै १४ अर्ब २ करोड २२ लाख रुपैयाँ बीमा शुल्क आर्जन गरेका छन् । चालु आर्थिक वर्षको ७ महिनाको अवधिमा बीमा कम्पनीहरुले मोटर बीमा शीर्षकमा ७ अर्ब ६८ करोड ७७ लाख रुपैयाँ संकलन गरेका छन् । त्यस्तै सम्पत्ति बीमा गराएबापत कम्पनीहरुले ६ अर्ब ३३ करोड ४५ लाख रुपैयाँ बीमा शुल्क संकलन गरेका छन् ।

त्यस्तै बीमा कम्पनीहरुले चालु आर्थिक वर्षको ७ महिनाको अवधिमा सामुन्द्रिक बीमाखेल बाट १ अर्ब ४५ कराड रुपैयाँ बीमा शुल्क संकलन गरेको छन् । त्यस्तै हवाई बीमालेखमार्फत कम्पनीहरुले १ अर्ब ५ करोड ५० लाख रुपैयाँ, इन्जिनियरीङ तथा ठेक्का बीमालेख बाट ३ अर्ब ६१ करोड ६ लाख रुपैयाँ र विविध बीमालेखमार्फत २ करोड ८५ लाख ५२ हजार रुपैयाँ बीमा शुल्क संकलन गरेका छन् ।

यो अवधिमा कृषि प्रधानदेशमा कृषि तथा बालि बीमा गराउनेको संख्या निकै कम देखिएको छ । बीमा कम्पनीहरुले कृषि तथा बालि बीमालेख मार्फत ९६ करोड ४७ लाख रुपैयाँ बीमाशुल्क संकलन गरेका छन् । अन्य सबै बीमालेखमा अर्बको व्यवसाय गरेका कम्पनीहरुले कृषि तथा बालि बीमामा भने कारोडको मात्रै व्यवसाय गरेका छन् ।

त्यस्तै यो अवधिमा लघु बीमालेख मार्फत कम्पनीहरुले ५१ करोड ३२ लाख रुपैयाँको बीमा शुल्क संकलन गरेका छन् ।