काठमाडौं । पछिल्लो समय कम्पनी दर्ता गर्ने र आवश्यक प्रक्रियाहरू पुरा नगर्ने कम्पनीको संख्या बढ्दै गएको छ । आवश्यक प्रक्रिया पुरा नगर्ने निजी, सरकारी तथा सार्वजनिक संस्थाहरूको संख्या अत्याधिक बढेको हो ।

कम्पनी रजिष्ट्रारको कार्यालयका अनुसार कार्यालयमा दर्ता भएका १ लाख ७३ हजार ७५ वटा कम्पनीले वार्षिक साधारणसभा मुनाफा बाँडफाँट लगायतका विवरणहरू पेश गरेका छैनन् । कार्यालयममा हालसम्म ३ लाख १६ हजार २२२ वटा कम्पनीहरू दर्ता भएका छन् । वार्षिक साधारण सभा, मुनाफा, घाटा, सञ्चालक समिति फेरबदल लगायतका विवरणहरू पेश नगर्नेमा सरकारी स्वामित्वका राष्ट्रिय बीमा कम्पनी लिमिटेड, नेपाल रेल्व कम्पनी लिमिटेड लगायतका संस्थाहरू रहेका छन् ।

कम्पनी ऐन, २०६३ को दफा ८० मा लगातार तीन आर्थिक वर्षसम्म विवरण पेश नगरेमा तथा कम्पनीले आफ्नो काराबार सञ्चालन नगरेमा कार्यालयले कम्पनीको दर्ता खारेज गर्न सक्ने व्यवस्था गरेको छ । सरकारले कम्पनी दर्ता खारेजका लागि समय–समयमा छुट सहितको व्यवस्था गरे पनि सरोकारावालाहरू नपुग्दा ठूलो संख्यामा रहेका बन्द तथा अलपत्र अवस्थामा रहेका कम्पनीहरू खारेज हुन सकेका छैनन् ।
कम्पनी रजिष्ट्रारको कार्यालयमा दर्ता भएका कम्पनीको चुक्ता पुँजी २० खर्ब ३१ अर्ब रुपैयाँ रहेको छ । ती कम्पनीहरूको अधिकृत पुँजी भने हजार खर्ब माथि रहेको छ ।