काठमाडौं । ‘लोभले लाभ लाभले विलाप’ यो नेपाली उखानले भने जस्तै भएको छ यतिखेर पोखराको न्यूरोडमा पसल सञ्चाल गर्दै आएका रमेश शर्मालाई । पोखरा–८ न्युरोडमा शर्मा आइटी हब सञ्चालन गर्दै आएका उनले लोभमा परेर आफ्नै पसलमा आगो लगाए । आगो लगाउनुको कारण थियो बीमा बापतको रकम लिनु ।

पसलका कामदारलाई बिदामा बसालेर आफ्नो पसलमा आफैंले आगो लगाएर उनी बीमा दाबीका लागि बीमा कम्पनीमा आवेदन दिन पुग्छन् । तर, उनलाई के थाहा बीमा बापतको रकमको लोभले उनलाई जेलसम्म पुर्याउँछ भन्ने । शर्माका आइटी अबमा फागुन १६ गते आगो लागो । उक्त आगो प्रहरी र दमकलको सहयोगमा निभाइयो । उनले बीमा दाबी गर्नका लागि आफैंले आगो लगाएर मोबाइल चार्ज गर्दा आगलागि भएको भन्दै बीमा रकम भुक्तानीका लागि निवेदन दिए ।

उनको पसल बन्द रहेको र कामदारहरु बिदामा रहेका र आगलागिको जुन कारण खुलाइएको थियो त्यसमा शंका लागेपछि प्रहरीले थप अनुसान्धान सुरु गर्यो । अनुसान्धानका क्रममा शर्मालेनै बीमा रकम दाबी लिनका लागि आगलागि गराएको तथ्य पत्ता लागेको कास्की प्रहरीले जनाएको छ ।

उनले उक्त पसरल पुस महिनामा मात्रै खोलेको र माघ महिनामा बीमा गराएको प्रहरीको भनाइ छ । प्रहरीका अनुसार उनले बीमा गरेको एक महिना भित्रै पसलमा आगो लगाएका छन् । प्रहरीले उनलाई पक्राउ गरेर थप अनुसन्धान गरिरहेको जनाएको । शर्माले पोखरा–२७ तालचोकमा पनि शर्मा आइटी हब सञ्चालन गर्दै आएका थिए ।

जगरनाथपुर गाउँपालिका वडा नम्बर ३ घर भएका रमेशले ५ वर्ष अगाडिदेखि शर्मा आइटी सोलुसन नामक पसल सञ्चालन गरिरहेका थिए । त्यहाँ ६ जना कामदारसमेत छन् । उनै शर्माले गत पुसमा न्युरोडमा पसल खोलेर माघमा बीमा गरी फागुन १६ गते आफैंले पसलमा आगो लगाएको पाइएको प्रहरीको भनाइ छ ।

आगलागीको अनुसान्धान गर्दै जाँदा प्रहरीले उनलाई फागुन २५ गते पक्राउ गरी अनुसन्धान गरिरहेको जनाएको छ ।