एजेन्सी । अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच मंगलबार वार्ता हुने भएको छ । रुसी राष्ट्रपति कार्यालयले वार्ताका मुद्दाहरू तय भइरहेको जनाएको छ ।

रुसी समाचार संस्था तासका अनुसार, रुसी राष्ट्रपति कार्यालयका प्रवक्ता दिमित्री पेस्कोभले अमेरिकी दूत स्टिभ विटकफ र विभिन्न तहमा भएका छलफलहरू ट्रम्प–पुटिन वार्ताको एजेन्डामा समावेश गरिएको बताएका छन् । पेस्कोभले भने, “सबै मुद्दाहरू वार्ताको एजेन्डामा रहनेछन्, तर स्पष्ट रूपमा यसको मुख्य विषय युक्रेन रहनेछ । यी सबै विषय राष्ट्रपतिको तयारीका लागि समेटिनेछन् ।”

यसैबीच, युक्रेनको विदेश मामिलासम्बन्धी संसदीय समितिका अध्यक्ष ओलेक्जेन्द्र मेरज्कोले युक्रेनसँग सम्बन्धित तीन सर्तहरूको उल्लेख गरेका छन् ।  उनले भनेका छन् कि युक्रेन आफ्नो सीमासम्बन्धी कुनै पनि सम्झौता गर्न तयार छैन र यसबारे कुनै वार्ता गर्नेछैन । त्यसैगरी, उनले थपे, “अन्तर्राष्ट्रिय सङ्गठनहरू, विशेष गरी नेटोको सदस्यतासम्बन्धी निर्णय पुटिनले गर्ने कुरा युक्रेनका लागि स्वीकार्य छैन ।” उनले आफ्नो रक्षा क्षमतासम्बन्धी पुटिनको कुनै सल्लाह स्वीकार्न तयार नभएको बताए ।

अमेरिकी राष्ट्रपति डोनाल्ड ट्रम्पले उनी मंगलबार रुसी राष्ट्रपति भ्लादिमिर पुटिनसँग युक्रेनको मुद्दामा वार्ता गर्न लागिरहेको बताएका छन् । ट्रम्पले भने, “मलाई लाग्छ कि हामी जमिनसम्बन्धी विषयमा कुरा गर्नेछौं, किनभने तपाईंलाई थाहा छ, युद्ध सुरु भएपछि यहाँ धेरै ठूलो परिवर्तन आएको छ । हामी ऊर्जा उत्पादन केन्द्रहरूबारे छलफल गर्नेछौं, जुन ठूलो प्रश्न बनेको छ ।”

ट्रम्पको यो भनाइ अमेरिका र युक्रेनका प्रतिनिधिहरूबीच साउदी अरबमा भएको वार्तापछि आएको हो । युक्रेनले साउदी अरबमा भएको बैठकपछि अमेरिका प्रस्तावित ३०दिनको तत्काल युद्धविराममा सहमति जनाएको छ । यो रूस र अमेरिकाबीच युद्ध अन्त्य गर्ने दिशामा पहिलो कदम हुनसक्छ । वास्तवमा, अमेरिका केही समयदेखि रूस र युक्रेनबीच युद्धविराम गराउने प्रयास गरिरहेको छ र यसका लागि रूसलाई सहमत गराउने काममा लागेको छ ।

सन् २०२५ को जनवरीमा राष्ट्रपति ट्रम्पले आफ्नो दोस्रो कार्यकाल सुरु गरेका थिए । त्यसपछि यो दोस्रो अवसर हो, जब ट्रम्प र पुटिनबीच वार्ता हुँदैछ । यसअघि, ट्रम्प र पुटिनबीच फेब्रुअरीमा छलफल भएको थियो । त्यस क्रममा, दुवै नेताबीच युक्रेन युद्ध अन्त्य गर्न उच्चस्तरीय वार्ताको सुरुवात गर्ने सहमति बनेको थियो ।