काठमाडौं । नेपाल धितोपत्र बोर्डमा भएका अनियमितताहरुको छानबिन प्रक्रिया अघि बढेको छ । संसद्को सार्वजनिक लेखा समितिले पुँजी बजारको सर्वाेच्च नियामक निकाय नेपाल धितोपत्र बोर्डमा भएका अनियमितताहरुको छानबिन अघि बढाउने निर्णय गरेको हो ।
शुक्रबार बसेको समिति बैठकले आगामी एक महिनाभित्र धितोपत्र बोर्डमा भएका अनियमितताहरुको छानबिन गरी प्रतिवेदन पेस गर्ने गरी पूर्वमन्त्रीसमेत रहेका सांसद गोकुल बास्कोटालाई जिम्मेवारी दिएको छ । बास्कोटा नेतृत्वको कार्यदलले ३० दिनभित्र धितोपत्र बोर्डका अनियमिततासम्बन्धी विभिन्न उजुरीहरुको विस्तृत अध्ययन गरी प्रतिवेदन तयार पार्ने छ । बास्कोटा नेतृत्वको कार्यदलको प्रतिवेदनका आधारमा समितिले कारवाहीका लागि निर्देशन दिनेछ ।
समितिमा विभिन्न मितिमा परेका उजुरीहरुमध्ये पाँचवटा उजुरीमाथि छानबिन गर्नुपर्ने निष्कर्ष निकालेको हो । पछिल्लो समय धितोपत्र बोर्डमा व्यापक अनियमितता भैरहेको आरोप लागिरहेको छ ।
प्रतिक्रिया दिनुहोस्