काठमाडौं । सरकारी स्वामित्वमा रहेको राष्ट्रिय जीवन बीमा कम्पनीले आफ्नो पहिलो साधारणसभाको मिति घोषणा गरेको छ । कम्पनीले २०८२ साल वैशाख ३ गतेका लागि साधारणसभाको मिति घोषणा गरेको हो ।

संस्थानबाट कम्पनीमा परिणत भए पछि आर्थिक वर्ष २०६९/७० देखि आर्थिक वर्ष २०७३/७४ सम्म गरी कुल ५ आर्थिक वर्षको साधारणसभा एक साथ गर्न लागेको हो । साधारणसभामा कम्पनीको पुँजी वृद्धि योजना अनुमोदनको लागि पेश हुदै छ । कम्पनीले सभामा सञ्चालक समितिको तर्फबाट अध्यक्षको प्रतिवेदन छलफल गरी पारित गर्ने, नेपाल सरकार को मिति २०८१/०२/०३ को निर्णय र तत्पश्चात् गठित सञ्चालक समितिलाई अनुमोदन गरी सोही सञ्चालक समितिलाई निरन्तरता दिने, लेखा परीक्षकको प्रतिवेदन सहितको साबिक राष्ट्रिय बीमा संस्थानको आर्थिक वर्ष २०६९/७०, २०७०/७१, २०७१/७२, २०७२/७३ र २०७३/७४ सम्मको वासलात, नाफा र नोक्सान हिसाब, सोही अवधिको नगद प्रवाह विवरण लगायतका वित्तीय विवरणहरू सहित अनुसूचीहरू छलफल गरी पारित गर्ने,आर्थिक वर्ष २०७६/७७, २०७७/७८ र २०७८/७९ को लेखा परीक्षण गर्न महालेखा परीक्षक कार्यालयको परामर्शमा सञ्चालक समितिबाट नियुक्त भएका वाह्य लेखा परीक्षकद्वय सुवास पौडेल र विजय सिंह पराजुलीको नियुक्ति र निजहरूको पारिश्रमिक अनुमोदन गर्ने प्रस्ताव अघि बढाउने योजना रहेको छ ।