एजेन्सी । अमेरिकाले आयात गर्ने सबै कारमा २५ प्रतिशत ट्यारिफ लागू गर्न लागेको छ । जसका कारण कारको मूल्य अत्यधिक बढ्ने अनुमान गरिएको छ । नयाँ ट्यारिफ आगामी अप्रिल ३ देखि लागू हुनेछ । त्यस्तै, कार उत्पादनमा प्रयोग हुने अधिकांश विदेशी निर्मित पाट्र्समा पनि केही समयपछि २५ प्रतिशत शुल्क लागू हुनेछ ।
राष्ट्रपति डोनाल्ड ट्रम्पका अनुसार यी शुल्कहरूले कार उत्पादकहरूलाई अमेरिकी भूमिमै उत्पादन स्थानान्तरण गर्न प्रेरित गर्नेछन् । तर, विशेषज्ञहरूले भने यो व्यावहारिक रूपमा सम्भव नभएको बताएका छन् । तर यदि कुनै तरिकाले सम्पूर्ण उत्पादन अमेरिकामा सार्न सम्भव भए पनि निर्माण लागत अत्यधिक महँगो पर्न जानेछ ।
त्यसबाहेक ट्रम्पले अमेरिकी बजारमा आउने स्टिल र एल्युमिनियममा पहिल्यै २५ प्रतिशत शुल्क लगाइसकेका छन् । साथै उनले तामामा पनि शुल्क लगाउने धम्की दिएका छन् । यी तीनवटै धातु कार निर्माणमा आवश्यक हुन्छन्, जसका कारण ती धातुमा लगाइएको शुल्कले कारको उत्पादन लागत थप बढाउनेछ ।
हालसालै, बुधबारका दिन मेक्सिकोको हर्मोसिलोस्थित फोर्ड हर्मोसिलो स्ट्याम्पिङ र एसेम्बली प्लान्टमा ट्रकहरू पार्क गरिएको दृश्य देखिएको थियो । समाचार अनुसार ट्रम्पका यी नयाँ शुल्कका कारण कारको मूल्य हजारौँ डलरले बढ्नेछ, र यो अपेक्षा गरेभन्दा छिट्टै लागू हुनेछ । २५ प्रतिशत शुल्कले प्रत्येक कारको मूल्य ५ हजार डलरदेखि १५ हजार डलरसम्म बढाउनेछ ।
अमेरिकामा ठूलो मात्रामा कार उत्पादन भए पनि, कुनै पनि कार शतप्रतिशत अमेरिकी निर्मित छैन । यसको कारण, धेरै पाट्र्स विदेशबाट आयात गरिन्छन् । उदाहरणका लागि, गत वर्ष अमेरिकाभित्र बेचिएका भोल्भो, माज्दा, भोक्सवागन, र हुन्डाई कारहरूको कम्तीमा ६० प्रतिशत विदेशी आयातित थिए ।
हाललाई, ट्रम्पले आफ्नो पहिलो कार्यकालमा वार्ता गरेको युनाइटेड स्टेट्स–मेक्सिको–क्यानडा एग्रिमेन्टअन्तर्गत आयात गरिएका कारहरू भन्सार शुल्क तिर्नुपर्ने छैन ।
प्रतिक्रिया दिनुहोस्