काठमाडौं । नेपाल राष्ट्र बैंकको गभर्नर नियुक्तिमा अर्थ मन्त्रालयले उमेरहदको मापदण्ड हटाएपछि यसमा चलखेल हुने देखिएको छ ।

पछिल्लो समय भएका नियुक्तिहरुमा व्यावसायिक घरानाहरुबीच आफ्नो मान्छे ल्याउने प्रतिस्पर्धा निकै नै बढेको छ । जसले गर्दा नियामकको पनि नियामक मानिने राष्ट्र बैंकको गभर्नर नियुक्तिमा राजनीतिक दल र व्यावसायिक घरानाबीच आफू निकटको व्यक्तिलाई गभर्नर बनाउन प्रतिस्पर्धा देखिएको हो ।

एक महिना अगाडिसम्म एक दजर्नभन्दा बढी व्यक्ति गभर्नरका लागि दावेवार देखिए पनि अब भने गभर्नर पदका लागि ५ जनाभन्दा बढी दौडमा छैनन् । अझ मन्त्रालयले गभर्नर नियुक्तिका लागि ६५ वर्षको उमेर कटेको व्यक्ति हुनसक्ने व्यवस्था गरेपछि पूर्वमुख्यसचिव राजेन्द्रकिशोर क्षेत्री र राष्ट्र बैंकका सञ्चालक तथा पूर्वकार्यकारी निर्देशक रविन्द्र पाण्डे गभर्नर हुने चर्चा शक्तिकेन्द्रमा चलेको छ । क्षेत्री पूर्वमुख्यसचिव भए पनि अर्थतन्त्रको बारेमा जानकार होइनन् । अर्थतन्त्रको जानकार भए पनि रविन्द्र पाण्डे पछिल्लो समय विकसित भएको अर्थतन्त्रको समस्याको बारेमा अवगत नभएको बुझाई राष्ट्र बैंकमा छ ।

स्रोतका अनुसार अझै पनि राष्ट्र बैंकका बरिष्ठ डेपुटी गभर्नर निलम ढुंगानाको सम्भावना हटेको छैन । उनी राष्ट्र बैंकको बरिष्ठ डेपुटी गभर्नर भएको हुँदा केपी ओलीले आफूले हरेक उच्च स्थानमा महिलालाई पुर्याएको जश लिएर भाषण गर्ने हुँदा उनको सम्भावना अझै पनि रहेको छ ।

यसबाहेक योजना आयोगको सदस्य रहेका राष्ट्र बैंकको कार्यकारी निर्देशक डा प्रकाश श्रेष्ठलाई गभर्नर बनाउन एमालेमा अझै दबाब छ । एमालेकै दोस्रो बरियताका नेताहरुले भनेर राजीनामा गरेका श्रेष्ठलाई अझै पनि प्रधानमन्त्री केपी शर्मा ओलीले नियुक्तिको लागि ‘एस’ भन्ने पक्षमा आएका छैनन् ।

प्रधानमन्त्रीको सचिवालय र प्रधानमन्त्रीसँग नजिक देखिएको टोली प्रकाशसँग भए पनि यसअघिका नियुक्तिमा सो समूह प्रभावशाली भएको थिएन । गभर्नर नियुक्त गराउँछु भनेर प्रकाशलाई आश्वस्त बनाएर राजीनामा दिएको टोलीले प्रकाशलाई आर्थिक रुपमा आधा करोडजति घाटा लगाउने चर्चा राष्ट्र बैंकका कर्मचारीहरुमा छ ।

यस्तै गभर्नर बन्न नै राजीनामा दिएका तथा २०७० सालमा गभर्नर बन्नका लागि तत्कालीन प्रधानमन्त्री सुशिल कोइरालालाई जिल्ला सभापतिको दबाब दिएका ज्ञानेन्द्र ढुंगाना गभर्नर नबनेमा वार्षिक ४ करोडजतिको नोक्सानमात्र हुने देखिन्छ ।

गभर्नर नियुक्तिको सिफारिस समितिमा रहेका सदस्यहरु पूर्वगभर्नर विजयनाथ भट्टराई अर्थतन्त्र नबुझेको र बैंकरलाई गभर्नरको सिफारिस गर्ने पक्षमा छैनन् । यही मान्यता विश्व पौडेलले बोक्छन् । कांग्रेसबाट अझै पनि पाण्डेसहित ज्ञानेन्द्र ढुंगाना र गुणाकर भट्ट गभर्नरको दावेदार हुन् ।

प्रधानमन्त्री ओली बैंकक जाने भएको हुँदा यो साता गभर्नर पदको लागि निकै ठूलो चलखेल हुने देखिन्छ । ‘गभर्नर जो बने पनि व्यावसायिक घरानाले रुचाएको मान्छे नै बन्ने हो, प्लान ‘ए’ भएन भने प्लान ‘डी’सम्म व्यवसायिक ग्रुपले नै बोकेको व्यक्ति गभर्नर बन्छ।’