काठमाडौं । चालू आर्थिक वर्षको १० महिनामा निर्यात व्यापार ७३ प्रतिशतले बढेको छ । भन्सार विभागको तथ्यांकअनुसार १० महिनामा २ खर्ब १७ अर्ब ९१ करोडको वस्तु निर्यात भएको छ। यो रकम गत आर्थिक वर्षको सोही अवधिमा ७२.७१ प्रतिशतले बढी हो ।

गत आर्थिक वर्षको १० महिनामा १ खर्ब २६ अर्ब १७ करोडको वस्तु निर्यात भएको थियो। भारतले तेलको भन्सार दरमा समायोजन गर्दा विगत केही महिनादेखि नेपालबाट सोयाविन तेलको निर्यात बढेका कारण समग्र निर्यात व्यापारमै वृद्धि देखिएको हो ।

चालु आर्थिक वर्षको साउनदेखि वैशाखसम्म १० महिनामा देशको व्यापार घाटा १२ खर्ब ५६ अर्ब २७ करोड रुपैयाँ पुगेको छ । भन्सार विभागले सार्वजनिक गरेको वैदेशिक व्यापारको तथ्यांकअनुसार यो रकम गत आर्थिक वर्षको सोही अवधिमा करिब ७ प्रतिशतले बढी हो । आर्थिक वर्ष २०८०र८१ को १० महिनामा व्यापार घाटा ११ खर्ब ७७ अर्ब १८ करोड रुपैयाँ थियो ।

चालु आर्थिक वर्षको साउनदेखि वैशाख महिनासम्म १४ खर्ब ७४ अर्ब १८ करोडको वस्तु आयात भएको छ । यो रकम गत आर्थिक वर्षको सोही अवधिमा १३.११ प्रतिशतले बढी हो । गत आर्थिक वर्षको पहिलो १० महिनामा १३ खर्ब ३ अर्ब ३५ करोडको वस्तु आयात भएको थियो ।