कैलाली । सुदूरपश्चिम प्रदेश सरकारले कूल विनियोजित बजेटको ४२.२७ प्रतिशत बजेटमात्रै खर्च गरेको छ ।

चालु आव २०८१र८२ को साउनदेखि जेठ मसान्तसम्मको ११ महिनाको अवधिमा प्रदेश सरकारले कूल विनियोजित बजेटको ४२.२७ प्रतिशत अर्थात् १३ अर्ब ३३ करोड चार लाख रुपैयाँ खर्च गरेको हो ।

सो अवधिमा प्रदेश सरकारले चालुतर्फ छ अर्ब ९७ करोड दुई लाख रुपैयाँ र पुँजीगततर्फ छ अर्ब ३६ करोड दुई लाख रुपैयाँ खर्च गरेको प्रदेश लेखा नियन्त्रक कार्यालयका प्रमुख वासुदेव जोशीले जानकारी दिए। उनका अनुसार भौतिक पूर्वाधार विकास मन्त्रालयले सबैभन्दा बढी पाँच अर्ब ७९ करोड ३३ लाख रुपैयाँ बजेट खर्च गरेको छ ।

सामाजिक विकास मन्त्रालयले दुई अर्ब ८६ करोड ७३ लाख रुपैयाँ, भूमि व्यवस्था, कृषि तथा सहकारी मन्त्रालयले ९९ करोड ६७ लाख र उद्योग, पर्यटन, वन तथा वातावरण मन्त्रालयले ९२ करोड ७६ लाख रुपैयाँ खर्च गरेको उनले जानकारी दिए।

कार्यालय प्रमुख जोशीका अनुसार मुख्यमन्त्री तथा मन्त्रिपरिषद्को कार्यालयले १६ करोड ७५ लाख रुपैयाँ, आर्थिक मामिला मन्त्रालयले ११ करोड ९२ लाख रुपैयाँ र आन्तरिक मामिला तथा कानुन मन्त्रालयले पाँच करोड २१ लाख रुपैयाँ खर्च गरेको छ ।

त्यस्तै,  प्रदेश व्यवस्थापिकाले १३ करोड ४१ लाख रुपैयाँ, प्रदेश नीति तथा योजना आयोगले दुई करोड ११ लाख रुपैयाँ र प्रदेश लोकसेवा आयोगले ४४ लाख रुपैयाँ खर्च गरेको उनले जानकारी दिए । प्रदेश लेखा नियन्त्रक कार्यालयका अनुसार प्रदेश सरकारले चालु आवका लागि कूल ३१ अर्ब ६२ करोड ९८ लाख रुपैयाँ बजेट विनियोजन गरेको थियो । त्यसमध्ये, चालुतर्फ १२ अर्ब ८५ करोड ७४ लाख र पुँजीगततर्फ १८ अर्ब ७६ करोड २४ लाख बजेट विनियोजन गरेको थियो ।