काठमाडौं।मौसम पूर्वानुमान महाशाखाले आजदेखि असोज २० गतेसम्म देशभर वर्षाको सम्भावना उच्च रहेको जानकारी दिएको छ।

असोज १८ गते (शनिबार)

 देशभर सामान्यतया बदली रहनेछ। कोशी, मधेश, बागमती, गण्डकी र लुम्बिनी प्रदेशका पहाडी र तराई भू–भागका धेरै स्थानमा मेघगर्जनसहित वर्षा हुने पूर्वानुमान गरिएको छ। यसैगरी, कोशी, मधेश, बागमती र गण्डकी प्रदेशका पहाडी र तराई भू–भागका एक–दुई स्थानमा भारी वर्षा र थोरै स्थानमा अति भारी वर्षा हुन सक्ने चेतावनी दिइएको छ।

असोज १९ गते (आइतबार)

यस दिन पनि देशभर सामान्यतया बदली रहनेछ। कोशी, मधेश, बागमती, गण्डकी र लुम्बिनी प्रदेशका धेरै स्थानमा मेघगर्जनसहित वर्षा हुने सम्भावना छ भने बाँकी प्रदेशका केही स्थानमा पनि वर्षा हुने अनुमान छ। कोशी, मधेश, बागमती, गण्डकी र लुम्बिनी प्रदेशका पहाडी र तराई भू–भागका केही स्थानमा भारी वर्षा र एक–दुई स्थानमा अति भारी वर्षा हुन सक्ने महाशाखाले जनाएको छ।

असोज २० गते (सोमबार)

यस दिन देशभर बदली रहने अनुमान छ। विशेषगरी कोशी, मधेश, बागमती, गण्डकी र सुदूरपश्चिम प्रदेशका धेरै स्थानमा मेघगर्जनसहित वर्षा हुने सम्भावना छ। यस्तै, गण्डकी र लुम्बिनी प्रदेशका पहाडी र तराई भू–भागका केही स्थानमा भारी वर्षा हुन सक्ने पूर्वानुमान गरिएको छ।

चेतावनी

मौसम महाशाखाले लगातारको वर्षाका कारण कोशी, मधेश, बागमती, गण्डकी र लुम्बिनी प्रदेशका पहाडी तथा तराई भू–भागका विभिन्न स्थानमा बाढी, पहिरो र भू–स्खलनको जोखिम उच्च रहने भन्दै सर्वसाधारणलाई सतर्क रहन अनुरोध गरेको छ।

यात्रु तथा स्थानीयवासीलाई आवश्यक सुरक्षा अपनाउन, अनावश्यक यात्राबाट जोगिन र विपद्को अवस्थामा सुरक्षा निकाय तथा स्थानीय प्रशासनसँग समन्वय गर्न आग्रह गरिएको छ।