काठमाडौं । विश्व सम्पदा सूचीमा सूचीकृत पशुपतिनाथ र बौद्धनाथ चैत्य जोड्ने गौरीघाट–कुमारीगाल–बौद्ध सडकको कालोपत्रे उप्काएर ‘आस्फाल्ड प्रविधि’ को कालोपत्रे गर्न लागिएको छ ।

कालोपत्रे भइरहेको सडक उप्काउन थालेपछि दुई विश्व सम्पदा जोड्ने मार्गमा धुलो उड्न थालेको स्थाीनयवासीको गुनासो छ । आयोजनाले सूचना पाटीसमेत नराखी कालोपत्रे उप्काएर के गर्न खोजेको हो भन्ने थाहा नभएको स्थानीयवासी मंगलबहादुर तामाङले गुनासो गरे ।

कालोपत्रे भइरहेको र त्यति धेरै नबिग्रिएको सडक भत्काएर स्रोतको दुरुपयोग भइरहेको उनको भनाइ छ । अपारदर्शी रूपमा हुने यस्ता काम रोकिनुपर्ने स्थानीयवासीको भनाइ छ ।

काठमाडौं महानगरपालिका–६ का अध्यक्ष भुवन लामा भने आस्फाल्ड प्रविधि प्रयोग गरेर कालोपत्रे राम्रो हुने भएकाले दुई विश्व सम्पदा क्षेत्रलाई राम्रो सडक बनाउने उद्देश्यले यस्तो कालोपत्रे गर्न लागिएको बताए । महानगरपालिका सार्वजनिक निर्माण विभागले छिटो गरी यो सडक निर्माण सक्ने जनाएको छ ।

विभागका तर्फबाट साइट इञ्चार्जका रूपमा खटिएका इञ्जिनियर प्रफुल्ल गर्तौला मङ्सिरसम्ममा करिब ४ किलोमिटर लामो सडक कालोपत्रे सकिने बताए । २ करोड रुपैयाँ लागतमा सडक कालोपत्र भइरहेको उनले सुनाए ।