काठमाडौं। रिलायन्स स्पिनिङ मिल्स लिमिटेडले वैदेशिक रोजगारीमा रहेका नेपाली नागरिकहरूका लागि निष्कासन गरेको प्रारम्भिक सार्वजनिक निष्कासन आज (२०८२ पौष १ गते) बाँडफाँट गरिएको छ ।
कम्पनीले जारी पुँजीको १०.१४ प्रतिशतले हुन आउने १९ लाख २६ हजार ६०० कित्ता सेयर बुक विल्डिङ्ग विधिमार्फत निष्कासन गरेको थियो । योग्य संस्थागत लगानीकर्ताका लागि निर्धारित ‘कट अफ’ मूल्य ९१२ रुपैयाँमा १० प्रतिशत छुट दिएर वैदेशिक रोजगारीमा रहेका नेपालीहरूलाई प्रतिशेयर ८२०.८० रुपैयाँको दरमा निष्कासन गरिएको थियो ।
वैदेशिक रोजगारीमा रहेका नेपालीका लागि छुटाइएको १ लाख १५ हजार ५९६ कित्ता सेयरका लागि कूल ३५ लाख १०२ जना आवेदकबाट १९ लाख ४४ हजार ३३० कित्ता सेयरको माग भएको थियो । यो माग निष्कासन गरिएको शेयरभन्दा करिब १७ गुणा बढी हो।
निष्कासन तथा बिक्री प्रबन्धक ग्लोबल आइएमई क्यापिटल लिमिटेडका अनुसार, न्यूनतम ५० कित्ताको सीमा तोकिएकाले, गोलाप्रथा विधिद्वारा बाँडफाँट गर्दा ३५ हजार १०२ जना योग्य आवेदकहरूमध्ये २,३११ जनाले मात्र सेयर पाएका छन् । यी भाग्यशाली आवेदकहरूलाई न्यूनतम ५० कित्ताको दरले सेयर बाँडफाँट गरिएको छ ।
वैदेशिक रोजगारीमा रहेका नेपाली नागरिकहरूले छोटो समयावधिभित्रै उल्लेख्य सहभागिता जनाएर निष्कासन कार्यलाई सफल बनाएकोमा निष्कासनकर्ता कम्पनी र बिक्री प्रबन्धकले आभार व्यक्त गरेका छन् ।
प्रतिक्रिया दिनुहोस्