न्यूह्यामसर नेपाली समाज (एनएनसी) को अगुवाइमा सञ्चालन गरिएको राहत संकलन अभियानमार्फत १ लाख २० हजार अमेरिकी डलरभन्दा बढी रकम संकलन गरी प्रधानमन्त्री दैवी प्रकोप उद्धार कोषमा हस्तान्तरण गरिएको हो।

संस्थाका अध्यक्ष लाक्पा शेर्पाको नेतृत्वमा रहेको प्रतिनिधिमण्डलले संयुक्त राष्ट्रसंघको महासभामा सहभागी हुन न्यूयोर्क पुगेका परराष्ट्रमन्त्री शिशिर खनाललाई न्यूयोर्कस्थित नेपाली महावाणिज्य दूतावासमा आयोजित कार्यक्रममा उक्त सहयोग रकम हस्तान्तरण गरेको जनाएको छ।

कार्यक्रममा बोल्दै परराष्ट्रमन्त्री खनालले भोटेकोशी बाढीपछि सहयोगका लागि हातेमालो गर्ने नेपाली अमेरिकी समुदाय, विदेशमा रहेका नेपाली तथा नेपालप्रति सद्भाव राख्ने सबैप्रति आभार व्यक्त गरे। उनले प्राप्त सहयोग राहत तथा पुनर्स्थापना अभियानमा प्रभावकारी रूपमा परिचालन गरिने विश्वास व्यक्त गरे।

न्यूह्यामसर नेपाली समाजका अध्यक्ष शेर्पाले अभियानमा सहयोग गर्ने व्यक्ति, परिवार, व्यवसाय, संघसंस्था तथा स्वयंसेवकप्रति धन्यवाद व्यक्त गर्दै बाढीपीडित परिवारलाई शीघ्र राहत र पुनर्स्थापनाको अवसर उपलब्ध गराउनुपर्ने आवश्यकता औंल्याए।

समाजका उपाध्यक्ष माधव गुरुङले समुदायको सामूहिक प्रयासबाट संकलित सहयोगले पीडितलाई आर्थिक राहत मात्र नभई एकता र ऐक्यबद्धताको सन्देशसमेत दिएको बताए।

कार्यक्रममा परराष्ट्र सचिव अमृतकुमार राई, न्यूयोर्कस्थित नेपाली महावाणिज्यदूत दधिराम भण्डारी, समाजका महासचिव प्रभात भट्टराई, कोषाध्यक्ष भेषराज शर्मा, सचिव शेखर राई तथा गैरआवासीय नेपाली संघ (एनआरएनए) न्यूह्यामसर च्याप्टरका अध्यक्ष रोशन गुरुङलगायतको उपस्थिति रहेको थियो।

भोटेकोशी बाढीको घटनापछि न्यूह्यामसर नेपाली समाजले दीप प्रज्वलन कार्यक्रम आयोजना गर्दै राहत संकलन अभियान सुरु गरेको थियो। अभियानअन्तर्गत न्यूह्यामसर दिदीबहिनी समूहले हरितालिका तीज कार्यक्रमका लागि संकलन गरिएको करिब १५ हजार अमेरिकी डलर बाढीपीडितको सहयोगमा उपलब्ध गराएको जनाएको छ। नेपालमा विपद् र शोकको अवस्था रहेकाले समूहले तीज कार्यक्रमसमेत स्थगित गरेको थियो।

राहत अभियानमा समिट न्यूह्यामसर एलएलसी, सनसाइन कम्युनिटी केयर इन्क, भिजन अफ इन्डिपेन्डेन्स एलएलसी, होम फर बटरफ्लाइज एलएलसी, हिमालयन फेमिली अफ न्यूह्यामसर तथा गुरुङ समाज न्यूह्यामसरलगायत विभिन्न संस्था र समुदायको उल्लेखनीय योगदान रहेको समाजले जनाएको छ।

यसैबीच, बाढीपीडित परिवारप्रति ऐक्यबद्धता जनाउँदै न्यूह्यामसर नेपाली समाजले आगामी अक्टोबर १० मा आयोजना गर्ने तय गरिएको वार्षिक ‘दशैं साँझ’ कार्यक्रमसमेत रद्द गरेको छ।