काठमाडौं । मोरङका व्यवसायीहरुले चालु आर्थिक वर्षको मौद्रिक नीतिले अर्थतन्त्र चलायमा बनाउन सहयोग पुग्ने बताएका छन् । उद्योग संगठन मोरङले आयोजना गरेको कस्ता आयो मौद्रिक नीति ? परिसंवाद कार्यक्रममा सहभागि उद्योगी व्यवसायीहरुले यस्तो बताएका हुन् ।

सो कार्यक्रममा कार्यक्रममा संगठनका अध्यक्ष्ँ राकेश सुरानाले वर्तमान समयमा वैंकहरुमा पर्याप्त तरलता भएपनि कर्जा प्रवाहमा देखिएको शितिलतालाई मध्यनजर गरी चालुपूंजी कर्जा मार्गदर्शनमा उल्लेखित भेरियन्स एनलाईसेस गरी कर्जा समायोजना गर्ने व्यवस्थालाई २०८२ साउन १ गते देखि लागुहुने समयवधि थप गर्ने, लघु, घरेलु, साना तथा मझौला उद्योगका लागि तोकिएको रु.१ करोडको सीमालाई पुनरावलोकन गर्ने, निर्माण व्यवसायीहरुको हकमा गरिएको व्यवस्था, शेयर धितोमा प्रवाह गर्ने कर्जामा विद्यमान रु.२० करोडको सीमा खारेज गर्ने व्यवस्थालाई अर्थतन्त्रलाई केहीहदसम्म चलायमान वनाउने विश्वास व्यक्त गरे ।

त्यसैगरी अध्यक्ष सुरानाले वैंक तथा वित्तीय संस्थाको निष्क्रिय सम्पति तथा गैर वैंकिङ व्यवस्थापन गर्न सम्पति व्यवस्थापन कम्पनी स्थापना गर्ने, ब्याजदर करिडोरको माथिल्लो सीमाको वैंकदरलाई ७ प्रतिशतबाट ६.५ प्रतिशत र नीतिगत दर ५.५ प्रतिशतबाट ५.० प्रतिशत कायम गर्ने, लघुवित्त वित्तीय संस्थाको सेवा सम्वन्धमा रहेका गुनासाको सम्वोधन गर्दै ग्राहक हित संरक्षण गर्न नियामकीय व्यवस्था गर्ने लगायतका विषय सकारात्मक भएको वताए ।

उनले मौद्रिक नीतिबाट सुधारको अपेक्षा लिएका ठुला उत्पादनमूलक उद्योगहरुका समस्या सम्वोधनका साथै उधारो कारोवार नियमनका विषयम मौद्रिक नीति मौन रहनुमा चिन्ता व्यक्त गरे । मौद्रिक नीतिको वुदा नं. ८३ मा उल्लेख गरिएको चेक अनादरलाई आधार मानी कालोसूचीमा राख्ने तथा बैंकिङ कारोबार बन्देज हुनेगरी खाता रोक्का राख्ने लगायतका व्यवस्था परिमार्जन गर्नेगरी विद्यमान कर्जा सूचना तथा कालो सूचीसम्वन्धी निर्देशनमा पुनरावलोन गरिने विषयले आगामी दिनमा कारोवारमा थप विचलन ल्याउने आशंका व्यक्त गर्दै यसतर्फ सजग हुन आग्रह गरे । उनले बैंक तथा निर्माण व्यवसायहरुलाई सहज हुने गरि आएको नीति सरहको व्यवस्था उत्पादनमूलक उद्योगहरुका लागि आगामी दिनमा राष्ट्र बैंकले जारी गर्ने सर्कुलर र निर्देशिकामा समेटिने विश्वास व्यक्त गरे ।

नेपाल वैंकर्स एशोसिएसन कोशी प्रदेशका अध्यक्ष एवं एन.एम.वि वैंक लिमिटेडका प्रदेश प्रमुख सन्तोष बुढाथोकीले निर्माण क्षेत्र, सेयर बजारलाई नीतिले चलायमान बनाउने धारणा राखे । अर्थतन्त्रको धेरै क्षेत्र मन्दिबाट प्रभवित भएको अवस्थामा लोनको माग बढाउने गरी राष्ट्र बैंकबाट सर्कुलर आउनेमा आशावादी रहेको उनले वताए ।

सप्तकोशी डेभलपमेन्ट वैंक लि.का दिनेश कुमार पोखरेलले वस्तु उपभोग गर्ने वर्ग देशबाट वाहिरिदै गएकाले आशातित रुपमा बजारमा वस्तुको माग घटदै गएको अवस्थामा विक्तीय क्षेत्रमा आउन सक्ने दबाबको पूर्व मूल्यांकन गरी आर्थिक स्थायीत्व कायम गर्न र बजार माग वढाउने दिशामा मौद्रिक नीति केन्द्रित हुने विश्वास व्यक्त गरे ।

चार्टर्ड एकाउन्टेन्ट तिर्थ यादवले देशका लागि ब्रेन ड्रेन मुख्य समस्याका रुपमा रहेतापनि रोजगार सिर्जनाका विषयमा र नया रोजगारी सिर्जनाम महत्वपूर्ण भूमिका निर्वाह गर्ने ठूला उद्योगहरुलाई तत्काल राहत पुर्‍याउने सन्दर्भमा मौद्रिक नीतिले सम्वोधन गर्न चुकेको बताउदै त्यस्ता विषयलाई नीतिमै समेटि सकारात्मक वातावरण वनाउनु पर्ने धारणा राखे ।

संगठनका वरिष्ठ उपाध्यक्ष नन्दकिशोर राठी, उपाध्यक्ष विपिन काबराले मौद्रिक नीतिले बाहिर जान चाहने युवाहरुलाई थप सहजता वनाएकोमा चिन्ता व्यक्त गर्दै वैंकहरुका साथै उद्योगीलाई समेत नीतिले संरक्षण गर्नुपर्ने धारणा राखे । संगठनद्धारा आयोजित कार्यक्रममा संगठनका पदाधिकारीहरु, कार्यसमिति सदस्यहरु, उद्योगी व्यवसायीहरु, नेपाल राष्ट्र वैंक कोशी निर्देशनालयका निर्देशक, विभिन्न वैंक तथा वित्तीय संस्थाका प्रमुखहरु, चार्टर्ड एकाउन्टेन्टहरुको सहभागिता रहेको थियो ।