काठमाडौं । नेपालमा रेमिट्यान्सलाई औपचारिक माध्यमबाट ल्याउने व्यवसायको थालनी गरेका चन्द्र ढकाल नेपालमा मर्जर तथा एक्विजेसनमा विशेषज्ञता हासिल गरेका उद्यमी हुन् भन्दा फरक नपर्ला ।
उनी अध्यक्ष रहेको ग्लोबल आईएमई बैंकमा ४ वटा वाणिज्य बैंकसहित दुई दर्जन वित्तीय संस्थालाई मर्जर तथा एक्विजेसन गरेको छ । जागिरे जीवनबाट कार्गो व्यवसाय हुँदै रेमिट्यान्समा सफल उद्यमीको परिचय बनाएका ढकालले रेमिट्यान्स कम्पनी पनि मर्जर गर्दै छन् ।
२०५७ साल जेठ २९ गते चन्द्र ढकाल र उनका भाइ हेमराज ढकाल(रामु)ले स्थापना गरेको आईएमईले जेएमई मर्जर भएर आईएमईको नामबाट एकीकृत कारोबार सुरु गर्दै छन् । वैदेशिक रोजगारीमा गएका नेपालीलाई वैधानिक रूपमा नेपालमा पैसा पठाउन सहज गर्ने कम्पनी बनेको आईएमईले जेएमईलाई मर्जर गरेसँगै आईएमईको अध्यक्ष पदबाट चन्द्र ढकाल बाहिरिएका छन् । आईएमई रेमिट्यान्सका सहसंस्थापक र प्रवन्ध निर्देशकका रूपमा रहेका हेमराज ढकाल अध्यक्ष बनेका छन् । व्यावसायिक यात्रा सुरु गरेको सफल बनाएको कम्पनीको अध्यक्षबाट २४ वर्षपछि बाहिरिएका हुन् ।
आईएमईलाई अहिलेको सफल बनाउन ढकाल दाजुभाइको नै महत्वपूर्ण भूमिका रहेको छ । नेपालभित्रको नेटवर्क बनाउने काम चन्द्र ढकालले गरे भने विदेशमा रहेर हेमराज ढकालले आईएमई व्यवसायलाई अगाडि बढाउने भूमिका खेलेका थिए । चन्द्र ढकालले गतवर्ष आफू अध्यक्ष रहेको चन्द्रागिरि हिल्स पनि छाडेका थिए । चन्द्रागिरिको संस्थापक अध्यक्ष रहेका हेमराज ढकाल दाजु चन्द्रले अध्यक्ष पद छाडेपछि अध्यक्ष बनेका थिए ।
चन्द्रागिरिमा आईमएईसहित अन्य व्यवसायीको पनि लगानी छ । तर, आईएमईमा भने अहिलेसम्म ढकाल दाजुभाइको मात्र लगानी थियो । मर्जरपछि भने यसमा अर्जुन पौडेल शर्माको सहित उनको परिवारको समेत लगानी हुने छ । आफ्नो लगानी रहेका व्यवसाय बैंकिङ र बीमा क्षेत्रमा मर्जरलाई सफलताका साथ कार्यान्वयन गरेका ढकालले रेमिट्यान्स कम्पनीको मर्जर कार्यक्रममा राष्ट्र बैंकले रेमिट कम्पनीलाई मर्जर गराउने नीतिलाई कार्यान्वयनमा ल्याएको बताए ।
उनले आफूहरू जापान बस्दा हामी आफैंले नेपालमा पैसा पठाउँदा खेपेको सकस, अनौपचारिक र असुरक्षित माध्यमका कारण धेरै नेपालीहरूले आफ्नै कमाइ आफन्तसम्म पु¥याउन झेलिरहेका समस्याहरू देखेको कारण आईएमईको जन्म भएको भन्दै अहिले पैसा पठाउने कामकै पर्याय बनेको खुसी व्यक्त गरे । ‘हामीले आईएमई सुरु गर्दा निजी क्षेत्रबाट रेमिट्यान्स सेवा दिने विषय सहज थिएन् ।
डलर कारोबारको अनुमति सहज थिएन । सानो पुँजी, धेरै किसिमका अवरोध, अनौपचारिक रूपमा रेमिट्यान्सको कारोबारको प्रभाव र अन्य धेरै समस्याबीच हाम्रो व्यवसायले गति लिन गरेको छ,’ ढकालले एकीकृत रेमिट कम्पनीको एकीकृत कारोबार सुरु हुने कार्यक्रममा भने । कार्गोबाट रेमिट कम्पनी हुँदै नेपालको ठूलो व्यावसायिक घराना बन्न सफल भएका ढकालले व्यवसाय सुरु गर्ने मुख्य ३ वटा सूत्र सुनाए ।
उनका अनुसार पहिलो हो, राज्यको प्राथमिकतामा रहेको व्यवसाय । दोस्रो आमजनतालाई सेवा दिन सकिने र बढीभन्दा बढी जनता लाभान्वित हुन सक्ने व्यवसाय तथा तेस्रो यस्तो व्यवसाय हो जुन आर्थिक रूपले पनि व्यवसाय बन्न सम्भव हुन्छ अर्थात् फिजिबल छ । त्यस्तो व्यवसाय सधैं सफल हुन्छ भन्ने हाम्रो विश्वास हो जुन आजका दिनसम्म पनि कायम छ भन्ने मलाई लाग्छ ।
१ करोड चुक्ता पुँजीको आईएमईले अब १ अर्बभन्दा बढीको कम्पनी भएको छ । रेमिट्यान्स सेवाबाट व्यावसायिक यात्रा सुरु गरेको आईएमईले अहिले आफ्नो लगानी सेवामूलक, उत्पादनमूलक र पूर्वाधार विकासका विभिन्न क्षेत्रमा विस्तार गरिसकेको छ । आईएमई ग्रुपअन्तर्गत रेमिट, बैंक तथा वित्तीय संस्थाहरू, केवलकार, होटल तथा रिसोर्ट, जलविद्युत्, अटोमोबाइल, बीमा, शिक्षा, स्वाथ्य, पर्यटन तथा सूचना प्रविधिका क्षेत्रमा विभिन्न कम्पनीहरू सक्रिय छन् । नेपालमा आउने रेमिट्यान्सको करिब ५० प्रतिशत बजार हिस्सा आईएमई र ग्लोबल आईएमई बैंकको रहेको छ ।
ढकालले रेमिट कम्पनीको मर्जर तथा कम्पनीको अध्यक्ष छाड्ने दिन आफ्ना भाइ हेमराज ढकाल, भाइहरू अर्जुन र खिलेन्द्र, अंकलहरू दिवाकर र रुद्र, तत्कालीन समयमा उच्च व्यवस्थापनमा रहेर काम गरेका चन्द्र टण्डन, सुमन पोखरेल, दामोदर खनाल, प्रशन्न बास्कोटा, अहिलेको उच्च व्यवस्थापनलगायत सम्पूर्ण कर्मचारी साथीहरूमा हार्दिक आभार व्यक्त गरे र २० हजारभन्दा बढी कर्मचारी र सेवाग्राहीलाई पनि धन्यवाद दिए ।
आईएमई ग्रुपलाई अगाडि बढाउन निकै महत्वपूर्ण भूमिका खेलेका चन्द्र ढकालका भाइ हेमराज ढकालपनि निजी क्षेत्रको संस्थामा पनि सक्रिय छन् । दाजु चन्द्र ढकाल निजी क्षेत्रको ठूलो संस्था नेपाल उद्योग वाणिज्य महासंघको अध्यक्ष हुन् । हेमराज ढकाल अहिले ठूला उद्योगी व्यवसायी सदस्य भएको नेपाल उद्योग परिसंघको उपाध्यक्ष हुन् ।
प्रतिक्रिया दिनुहोस्