एजेन्सी । विमान निर्माता कम्पनी एयरबसले उत्पादन गरेका ए३५० मोडेलका विमानमा समस्या देखिएपछि हङकङको प्रमुख हवाई सेवा प्रदायक क्याथे प्यासिफिकले आफ्ना दर्जनौँ उडान एक साथ रद्द गरेको छ । विमानहरूको निरीक्षण गर्दै इन्जिनको समस्या फेला पारेपछि दर्जनौँ उडानहरू रद्द गरेको कम्पनीले जनाएको छ ।
कम्पनीले सोमबारदेखि सबै विमानको उडान रद्द गरिएको जनाएको छ । हङकङबाट जुरिच जाँदै गरेको विमानको इन्जिनको एउटा भागमा समस्या देखिएको थियो । उक्त विमान फर्केर हङकङ आएको थियो ।
क्याथेले एक विज्ञप्तिमा भनेको छ, “यो कम्पोनेन्ट ए३५० विमानमा यस्तो समस्या देखाउने विश्वकै पहिलो घटना थियो । ४८ वटा विमानमा निरीक्षणपछि केही इन्जिनमा समस्या पत्ता लागेपछि उडान रद्द गरिएको हो ।”
मङ्गलबार दिउँसोसम्ममा कम्पनीले इन्जिनको प्रभावित भागहरू भएको १५ विमान पहिचान गरेको थियो । जसमा तीन विमान मर्मत गरिएको थियो । समस्या देखिएका सबै विमानहरु मर्मत गरी शनिबारसम्म पुनः सञ्चालनमा आउने जनाइएको छ ।
क्याथेले सोमबार र मङ्गलबार सञ्चालन गर्ने २४ उडानहरू रद्द गरिसकेको थियो भने बुधबारका लागि १० क्षेत्रीय उडानहरू रद्द गर्न सक्ने बताएको छ । रायटर्सका अनुसार, इन्जिनको समस्यामा इन्धन नोजलको समस्या पनि थियो ।
यो समस्या ए३५० मा देखिएको छ । जबकि प्रतिद्वन्द्वी बोइङले पछिल्लो केही वर्षयता निकै ठूला समस्या भोगिरहेको छ । अमेरिकन विमान निर्माता कम्पनीले यस वर्षको सुरुमा अलास्का एयरलाइन्सद्वारा सञ्चालित ७३७ म्याक्स विमानको उडानमा ढोका प्लगको फुल्ने समस्यासँग जुध्नुपरेको थियो ।
क्याथेले इन्जिन समस्याका बारेमा विमान निर्माता कम्पनी एयरबस, इन्जिन निर्माता रोल्स–रोयस, र नियामकहरूसँग सम्पर्क गरेको जनाएको छ । एयरबसका अनुसार, ए३५० विमानहरू रोल्स–रोयसको दुई प्रकारका ट्रेन्ट एकडब्ल्युबी टर्बोफ्यान इन्जिन मोडेलहरू प्रयोग गर्छन् ।
प्रतिक्रिया दिनुहोस्