काठमाडौं । नेपाल पर्यटन बोर्डको प्रमुख कार्यकारी अधिकृत (सीईओ) नियुक्तिविरुद्ध सर्वोच्च अदालतमा रिट परेको छ । बोर्डका पूर्वसीईओ डा. धनन्जय रेग्मीले बढी नम्बर ल्याउने र एक नम्बरमा सिफारिस भएको व्यक्ति (आफू) लाई नियुक्त नगरेर कम नम्बर ल्याउनेलाई नियुक्त गरेको भन्दै सीईओ नियुक्तिविरुद्ध रिट निवेदन दायर गरेका हुन् ।

रेग्मीले दीपकराज जोशीलाई नियुक्त गरेको विषयमा असन्तुष्टि जनाउँदै सर्वोच्च अदालतमा बुधबार रिट निवदेन दिएका हुन् । नेपाल पर्यटन बोर्डको सीईओमा दोस्रो नम्बरमा रहेका दीपकराज जोशीको नियुक्ति गरेपछि सर्वोच्च अदालतमा रिट दायर भएको हो । रेग्मी पहिलो नम्बरमा रहेका थिए । तर बरियतामा दोस्रो नम्बरमा रहेका व्यक्तिलाई अंक लुकाउँदै नियुक्ति गरेको आरोप लगाउँदै उक्त नियुक्ति बदरको माग रिटमा गरिएको छ ।

बिहीबार बसेको बोर्ड सञ्चालक समितिको बैठकले जोशीलाई सीईओ नियुक्त गरेको थियो । उक्त रिटको पेसी बुधबारलाई तोकिएको छ ।