एजेन्सी । यदि तपाईं भारतमा हुनुहुन्थ्यो र तपाईंको साथमा ९ लाख भारु हुन्थ्यो भने के किन्नुहुन्थ्यो ? कार किन्नुहुन्थ्यो वा विश्व भ्रमण गर्नुहुन्थ्यो । कि हिराको गहना वा कोल्डप्ले कन्सर्टको टिकट किन्नुहुन्थ्यो ?
ब्रिटिश रक ब्यान्ड कोल्डप्लेले अर्को वर्ष मुम्बईमा आफ्नो गर्र्न लागेको म्युजिक अफ द स्फियर्सको वर्ल्ड टुरको तीन शो प्रदर्शन गर्न लागेको छ । बुकमाईशो कन्सर्टको आधिकारिक टिकटिङ प्लेटफर्ममा उक्त कन्सर्टका टिकटहरू केही मिनेटमै बिक्री भएका छन् । त्यसपछि रिसेलिङ प्लेटफर्ममा ती टिकटहरूको मूल्य अत्यधिक मात्रामा बढाइएको छ ।
टिकटहरू गत आइतबार बिक्रीमा आएका थिए, जसको मूल्य २५ सय भारुदेखि १२ हजार भारुसम्म थियो । एक लााख ८० हजार टिकट किन्नका लागि एक करोडभन्दा बढी मानिसहरूले प्रतिस्पर्धा गरेका थिए ।
प्रशंसकहरूले लामो डिजिटल लाइनमा कुर्नुपरेको थियो र वेबसाइट क्र्यास भएको थियो । धेरैले टिकट बिक्रीमा धाँधली भएको आरोप लगाएका छन् । किनकि टिकटहरू आधिकारिक वेबसाइटमा आउनुअघि नै रिसेलरहरुले पाँच गुणासम्म बढडी मूल्यमा बिक्री गर्न थालिसकेका थिए । उनीहरुले एउटा टिकटको मूल्य ९ लाख भारु अर्थात करिब साढे १४ लाख रुपैयाँसम्म राखेका थिए ।
यस महिनाको सुरुमा युकेमा ओएसिसको कन्सर्टका लागि टिकट बिक्री हुँदा पनि यस्तै समस्या आएको थियो । जहाँ पुनः विक्रेताहरूले १३५ पाउन्डको टिकटलाई ३५० पाउन्डसम्म बेचिरहेका थिए । तर कोल्डप्ले टिकटहरूको यो अत्यधिक मूल्य अझै पनि ध्यान दिन लायक छ । तुलना गर्दा, मडोनाले आफ्नो सेलेब्रेशन टुरका लागि भीआईपी पासको मूल्य १ हजार तीन सय ६ पाउन्ड राखेका थिए भने बेयोनसेको रेनेसन्स कन्सर्टका सर्वश्रेष्ठ टिकटहरू २४ सय पाउन्डमा बिक्री भएका थिए ।
यस घटनाले भारतमा टिकट स्क्याल्पिङबारे ठूलो बहस सुरु गरेको छ । जहाँ मानिसहरूले बटहरू वा स्वचालित उपकरणहरूको प्रयोग गरेर लाइनलाई छलेर धेरै टिकट किन्न सक्छन् । र, रिसेलर प्लेटफर्महरूमा बेच्न सक्छन् ।
यसअघि पञ्जाबी गायक दिलजीत दोसाझको आगामी कन्सर्टको टिकट किन्न पनि यस्तै समस्या आएको थियो । तत्कालीन समयमा पनि रिलेसल प्लेटफर्ममा ठूलो मूल्यमा टिकट बिक्री गरेका थिए ।
प्रतिक्रिया दिनुहोस्