काठमाडौं । थाई एयरवेजका तर्फबाट सो एयरलाइन्सको जीएसए सोसाइटी इन्टरनेशनल ट्राभल्सद्वारा आयोजित रक्तदान कार्यक्रम सम्पन्न भएको छ । ‘जीवनको उपहार दिऔं’ भन्ने मुल नारासहित काठमाडौंको हात्तीसारमा कार्यक्रम आयोजना गरिएको थियो । उक्त कार्यक्रम बिहान १० बजेबाट दिउँसो १ बजेसम्म सञ्चालन भएको थियो ।

मानव सेवा र सामाजिक उत्तरदायित्वअन्तर्गत यो रक्तदान कार्यक्रम आयोजना गरिएको सोसाईटी इन्टरनेसनल ट्राभल्सले जनाएको छ । आपतकालीन अवस्थामा रगतको आवश्यकता पर्ने बिरामीहरूलाई सहयोग पु¥याउनु र समुदायप्रति उत्तरदायी भूमिका निर्वाह गर्नु कम्पनीको प्रमुख उद्देश्य र दायित्व हो ।

थाई एयरवेजले सबैलाई रक्तदानमा सहभागी भई जीवन बचाउने पुण्य कार्यमा हातेमालो गर्न आग्रह गरेको थियो । ‘तपाईंको सानो योगदानले कसैको जीवन बच्न सक्छ,’ थाई एयरवेजले भनेको छ ।

उक्त कार्यक्रममा सोसाइटी इन्टरनेशनल परिवार, विभिन्न ट्राभल एजेन्सी तथा सेवाग्राहीहरू गरेर १ सय ३१ जनाले रक्तदान गर्नु भएको थियो । कार्यक्रममा नेपाल रेडक्रस सोसाइटीले क्लिनिकल तथा चिकित्सकीय सहयोग उपलब्ध गराएको थियो।

उक्त अवसरमा सहभागी सबै रक्तदाताहरूलाई धन्यवाद स्वरुप प्रमाणपत्र पनि प्रदान गरिएको थियो ।