Skip to content

नेपालले संरक्षण र वातावरणीय व्यवस्थापनमा उल्लेखनीय प्रगति गरेको छः मन्त्री बस्नेत

काठमाडौ । ऊर्जा, जलस्रोत तथा सिँचाइमन्त्री शक्तिबहादुर बस्नेतले नेपालले संरक्षण र वातावरणीय व्यवस्थापनमा उल्लेखनीय प्रगति गरेको बताउदै यस क्षेत्रमा नेपाल विश्वमै उदाहरणीय बनेको उल्लेख गरेका  छन् । राष्ट्रिय प्रकृति संरक्षण कोषले आज यहाँ आयोजना गरेको कार्यक्रममा उनले प्राकृतिक सम्पदाको संरक्षणमा नेपालको समर्पण र अथक प्रयासहरू सहनीय रहेको र विश्वभरका संरक्षणवादीहरूका लागि उत्कृष्ट उदाहरणको रूपमा रहेको उल्लेख गरे ।

‘वर्तमान सन्दर्भमा जलवायु परिवर्तनका मुद्दाहरू मुख्य छन् । हिमाली राष्ट्रको रूपमा, नेपालले जलवायु परिवर्तनबाट गम्भीर खतराहरूको सामना गरिरहेको छ, हाम्रा हिमालय र हिमनदीहरू तीब्र रुपमा पग्लिरहेका छन्। यस संकटलाई निम्त्याउने उत्सर्जनको लागि हामी थोरै जिम्मेवारी वहन गर्दा पनि हामी यसको प्रभावलाई न्यूनीकरण गर्न र यसका चुनौतीहरूलाई अनुकूलन गर्ने हाम्रो प्रतिबद्धतामा प्रतिबद्ध छौं’ मन्त्री बस्नेतले भने । यसमा विश्वको ध्यान जानुपर्ने उनको भनाइ थियो ।

विगतका केही दशकमा, नेपालले हाम्रो प्राकृतिक वनको ढाँचा बढाउन र समुदायमा आधारित वन व्यवस्थापन अभ्यास लागू गर्न उल्लेखनीय प्रगति गरेको जानकारी गराउँदै मन्त्री बस्नेतले भने, ‘पछिल्लो दशकमा नेपालमा बाघको सङ्ख्या झण्डै तीन गुणा बढेको छ र एकसिङ्गे गैँडाको सङ्ख्यामा पनि उल्लेखनीय वृद्धि भएको छ । यस सन्दर्भमा, म विश्व समुदायलाई हामीले प्रदान गर्ने अमूल्य वातावरणीय सेवाको लागि नेपाललाई चिन्न र क्षतिपूर्ति दिन आह्वान गर्दछु । अर्बौं मानिसलाई पानीको प्रबन्ध गर्नेदेखि लिएर सङ्कटमा परेका प्रजातिको संरक्षणसम्म, विश्वव्यापी वातावरणीय स्थिरतामा नेपालको योगदान अतुलनीय योग्य छ ।’

कार्यक्रममा संयुक्त अधिराज्यको हाउस अफ लर्डस्का सदस्य एवं कोषका सदस्य क्यामोइजले नेपालले जैविक विविधता संरक्षणमा हासिल गरेको उपलब्धि र स्थानीयको सहभागिताको प्रशंसा गर्दै सहयोगको प्रतिबद्धता व्यक्त गरे। नेपाल सरकारका मुख्यसचिव डा बैकुण्ठ अर्यालले संरक्षण अभियानमा कोषको लामो अनुभव र हासिल गरेका उपलब्धि प्रशंनीय रहेको चर्चा गर्दै संरक्षण अभियानमा नेपालले भोग्नुपरेका चुनौतीको सामना गर्न विश्व समुदायको वित्त र प्राविधिक सहयोगको आवश्यकता औँल्याए ।  

कोषका अध्यक्ष डा कृष्णप्रसाद ओलीले नेपालले संरक्षण अभियानमा हासिल गरेका उपलब्धि र प्रक्रियाका बारेमा जानकारी गराउनुभएको थियो । त्यसैगरी कोषका अर्का सदस्य क्यास एफ डि स्टोप्पेलार र सदस्य सचिव शरदचन्द्र अधिकारीले कोषले गरेका कामका बारेमा चर्चा गरेका थिए ।

प्रतिक्रिया दिनुहोस्

Copyright 2024 © laganinews.com | All rights reserved.

Designed & Maintained by Eservices Nepal