काठमाडौं । अर्थमन्त्री वर्षमान पुनले नेतृत्व फेरिए पनि नीति फेरिन नहुने बताएका छन् । शुक्रवार काठमाडौंमा आयोजित एक कार्यक्रमलाई सम्बोधन गर्दै अर्थमन्त्री पुनले यस्तो बताएका हुन् ।

उनले आगामी वर्षको बजेटमार्फत कृषि उत्पादनलाई कर नीतिमार्फत संरक्षण गर्ने नीति लिइएको बताउँदै नेतृत्व फेरिए पनि नीति फेरिन नहुने बताए । चालु आर्थिक वर्षमा कृषि उत्पादनहरुमा भ्याट लगाइएको भए पनि सरकारले आगामी आर्थिक वर्षका लागि ल्याएको बजेटमा कृषिलाई संरक्षण गर्न भ्याट हटाएको उनको भनाइ थियो । यो नीतिले कृषिको आधुनिकीकरण र व्यवसायीकरणमा योगदान पुग्ने उनले विश्वास व्यक्त गरे ।

धेरै तिरको छलफल, बहस र अन्तरक्रियापछि आर्थिक वर्ष २०८१–२०९१ लाई कृषि दशक घोषणा गरेको जानकारी गराउँदै उनले नीतिगत स्थायीत्वमा जोड दिए । ‘राजनीतिक नेतृत्व फेरिराख्छ, हाम्रो मन्त्रीहरु फेरिन सक्छन्, तर हाम्रा नीतिहरु फेरिनु हुँदैन । नीतिगत स्थायित्व हुनुपर्छ,’ उनले भने ।