म्याग्दी । म्याग्दीमा पछिल्लो एक वर्षको अवधिमा एक हजार चार सयभन्दा बढी घरधुरीमा केन्द्रीय प्रसारण लाइन विस्तार भएको छ ।
नेपाल विद्युत् प्राधिकरण म्याग्दी वितरण केन्द्रले आर्थिक वर्ष २०८०/८१ मा जिल्लाका विभिन्न ठाउँमा एक हजार चार सय ३८ उपभोक्ता थपिएका जनाएको छ । केन्द्रका सूचना अधिकारी प्रकाश झाले थप ११ वटा नयाँ ट्रान्सफर्मर जडान गरेर विद्युत् वितरण गरेको जानकारी दिए ।
‘म्याग्दीका शतप्रतिशत घरधुरीमा केन्द्रीय प्रसारण लाइनको विद्युत् विस्तार गर्ने कार्यक्रममार्फत ११ वटा बस्तीका ९ सय ४५ घरधुरीमा बिजुली पुगेको छ’, उनले भने, ‘यसअघि विद्युतीकरण भएका बस्तीमा थप चार सय ९३ घरमा यसपालि मिटर जडान भएको छ ।’
मालिका गाउँपालिका–६ दुखुका ९९, रघुगङ्गा–७ चिमखोलामा ६५, ८ मङ्गलेका २३, धौलागिरि–६ मराङमा एक सय तीन, मालिका–२ रुममा दुई सय ५६, धौलागिरी–३ दरमा ७६, मालिका–३ खतेनमा ५०, लुप्सीपारमा ५४, मालिका–४ ओखरबोटमा एक सय दुई, मालिका–१ छिस र रिठेचौरका एक सय १७ घरधुरीमा नयाँ मिटर जडान भएको झाले बताए।
उज्यालोका लागि सोलार, मट्टितेलको टुकी, दियालो र सिट्ठामा निर्भर स्थानीयवासीमा बिजुली बलेपछि खुसियाली छाएको छ । घरायसी काम, विद्यार्थीलाई अध्ययन गर्न सहज हुनुका साथै उद्यम व्यवसाय सञ्चालन गर्ने अवसर सिर्जना भएको मालिका–३ का वडाध्यक्ष मोतीप्रसाद बुढाले बताए।
यसवर्ष थपिएका म्याग्दी वितरण केन्द्रअन्तर्गत २२ हजार आठ सय २१ विद्युत्का ग्राहक पुगेका छन् । आव २०७९/८० मा एक हजार दुई सय ३८ र २०७८/७९ मा ७७० घरधुरीमा नयाँ लाइन जडान भएको थियो ।
पर्वतको जलजला गाउँपालिकाको मल्लाज, वारीबेनी क्षेत्रमा पनि म्याग्दी वितरण केन्द्रअन्तर्गत मिलनचोक सवस्टेशनमार्फत विद्युत् वितरण हुँदै आएको छ । गत आवमा म्याग्दी वितरण केन्द्रमार्फत रु. २२ करोड ५५ लाख २४ हजार २१ महसुल सङ्कलन भएको छ ।
समयमा महसुल नबुझाउने तीन सय ७८ ग्राहकको लाइन काटेर रु ३६ लाख तीन हजार नौ सय ६० बक्यौता असुल गरिएको छ । ६० दिनसम्म महसुल नतिर्नेको लाइन काट्ने र छ महिनासम्म महसुल नबुझाउनेलाई कालोसूचीमा राखिने प्राधिकरणले जनाएको छ ।
समयमा वास्तविक मिटर रिडिङ र अभिलेखमा एकरुपता तथा लाइनको सुुदृढीकरणसँगै लक्ष्यभन्दा बढी विद्युत् चुहावट नियन्त्रण गरिएको प्राधिकरणका वितरण केन्द्र प्रमुख सत्यनारायण गामीले बताए। प्राधिकरणले १२.०७ प्रतिशत चुहावट नियन्त्रणको लक्ष्य दिएकोमा म्याग्दीमा १२.२५ प्रतिशत नियन्त्रण भएको उनले बताए ।
प्रतिक्रिया दिनुहोस्