काठमाडौं । नेपाली महिला सोना श्रेष्ठलाई एसियाली विकास बैंकको दक्षिण एसिया विभागको महानिर्देशकमा नियुक्त गरिएको छ। यस नियुक्तिसँगै श्रेष्ठ बंगलादेश, भुटान, भारत, माल्दिभ्स, नेपाल र श्रीलंकामा एडीबीका रणनीति निर्माण, विकास कार्यक्रम र कार्यान्वयनको नेतृत्व गर्ने जिम्मेवारीमा पाएकी छिन् ।

उनी यसअघि सो विभागकी उपमहानिर्देशक थिइन् र एडीबीको उच्च नेतृत्व तहमा पुग्ने थोरै नेपाली महिलामध्ये एक बनेकी छन्। नियुक्तिपछि श्रेष्ठले आफूलाई दक्षिण एसिया विभागको महानिर्देशक पदमा नियुक्त गरिएकोमा गर्व लागेको बताईन । यस क्षेत्रमा समावेशी र दिगो विकासमा योगदान पुर्‍याउन सदस्य राष्ट्रहरूसँग सहकार्य गर्ने प्रतिबद्धता व्यक्त गरेकी छन्। उनले एडीबीको संलग्नता अझ गहिरो बनाउन र विकासशील राष्ट्रहरूसँग मिलेर प्रभावकारी कार्यक्रम सञ्चालन गर्न सकिने आशा पनि व्यक्त गरेकी छन्।

श्रेष्ठको अनुभवले उनलाई अन्तर्राष्ट्रिय विकास, नीतिगत विश्लेषण, परियोजना सञ्चालन र मूल्यांकनमा विशेष दक्षता दिएको छ। उनी अर्थशास्त्रमा अमेरिकाको युनिभर्सिटी अफ क्यालिफोर्नियाबाट पीएचडी र स्मिथ कलेजबाट बीए हासिल गरेकी छन्। अन्तर्राष्ट्रिय विकास क्षेत्रमा बिताएका २७ वर्षमध्ये २३ वर्ष उनले एडीबीमै काम गर्दै मध्य र पश्चिम एसिया, दक्षिण एसिया र दक्षिणपूर्वी एसियामा व्यापक अनुभव हासिल गरेकी छन्।

विशेष गरी एडीबीमा उनको नेतृत्वले विभिन्न परियोजना र नीतिगत पहललाई सुदृढ पार्दै क्षेत्रका विकासशील राष्ट्रहरूमा आर्थिक सुधार र दिगो विकासलाई गति प्रदान गरेको छ। उनको नियुक्ति नेपाली महिलाका लागि प्रेरणास्रोतका रूपमा हेरिएको छ, किनभने उच्च नेतृत्वमा पुगेकी थोरै नेपाली महिला मध्ये उनी एक मात्र व्यक्ति हुन्।