काठमाडौं । सरकारी स्वामित्वको नेपाल रिन्स्योरेन्स कम्पनीलाई कुनै पनि हालतमा कब्जा गर्ने रणनिती बनाएर लागेका हिमालयन रि इन्स्योरेन्स कम्पनीका संन्चालकसहिकतको योजना चक्नाचुर भएको छ ।

नेपाल रिन्स्योरेन्स कम्पनीलाई कुनै पनि हालतमा कब्जा गर्न खोज्नेहरु धितोपत्र बजारलाई प्रभावित पार्ने कार्य र जालसाजीयुक्त कारोबारमा फसेका छन् ।

धितोपत्र बोर्डले गरेको अध्ययनले यस्तो देखाएको हो । व्यवसायी दीपक भट्टले गरेको झुठो कारोबार, मूल्यमा उतार चढाब र जालसाजीयुक्त कारोबारको अध्ययन गर्दैजाँदा अन्य व्यवसायी तथा कम्पनीको पनि संलग्नता देखिएको छ ।

बोर्डले गरेको अध्ययनले व्यवसायी दीपक भट्ट र धितोपत्र दलाल व्यवसायी भृकुटी स्टक ब्रोकिङ्ग कम्पनीका कार्यकारी प्रमुख संदिप चाचानले धितोपत्र सम्बन्धी ऐन, २०६३ को दफा ९६ को उपदफा (१) र दफा ९८ बमोजिमको कसूर गरेको देखिएको छ ।

भट्ट र चाचानले यस्तो गैह्र कानूनी काम गर्न हिमालयन रिइन्स्योरेन्स कम्पनी, हिमालयन क्यापसर्व, नेपाल माइक्रो इन्स्योरेन्स कम्पनी, हिमालय सेक्युरिटिज बैंकर, एचएलआई लार्ज क्याप फण्ड, रोहित गुप्ता र शेखर गोल्छाको रकम प्रयोग भएको देखिएको छ ।

त्यस्तै शुभी अग्रवाल, हिमालयन लाइफ इन्स्योरेन्स, ऋषि राज मोर र राज बहादुर शाह समेतले नेपाल रिइन्स्योरेन्सको सेयरको मूल्य बढाउने काम गरेको देखिएको छ । उनीहरुले धितोपत्र सम्बन्धी ऐन, २०६३ को दफा १०३ को उपदफा (३) बमोजिम कसुर गरेको पाइएको छ ।

यस्तै भट्टले धितोपत्र सम्बन्धी ऐन, २०६३ को दफा ९४, ९५ र ९८ बमोजिमको कसूर गरेको देखिएको छ । भूकुटी स्टक ब्रोकिङ्गका कार्यकारी प्रमुख चाचानले सहयोग गरेको देखिएको छ ।

शुभी अग्रवाल, राज बहादुर शाह र ऋषिराज मोरबाट धितोपत्र सम्बन्धी ऐन, २०६३ को दफा ९६ को उपदफा (१) र दफा ९८ बमोजिमको कसूर गरेको देखिएको छ । यसमा भृकुटी स्टक ब्रोकिङ्गङ्का कार्यकारी प्रमुख चाचानले सहयोग गरेको देखिएको छ ।

यस्तै हिमालय इन्भेष्टमेन्ट बैंकर र हिमालयन लाइफ इन्स्योरेन्सले एनआरआईसीको सेयर कारोबारबाट धितोपत्र सम्बन्धी ऐन, २०६२ को दफा ९४ को खण्ड (क) र दफा ९५ बमोजिमको कसूर गरेको देखिएको छ ।

बोर्डले गरेको अनुसन्धानले हिमालय क्यापसर्भ, हिमालयन रिइन्स्योरेन्स, क्रेष्ट माइक्रो लाइफ इन्स्योरेन्स र प्रोटेक्टिभ माइक्रो इन्स्योरेन्सले गरेको एनएलजी इन्स्योरेन्सको सेयर कारोबारबाट धितोपत्र सम्बन्धी ऐन, २०६३ को दफा ९४ को खण्ड (क) र दफा ९५ बमोजिमको कसूर गरेको देखिएको छ ।

एनएलजी इन्स्योरेन्स कम्पनीको सेयर मूल्य बढाउन शुभी अग्रवाल, हिमालय इन्भेष्टमेन्ट बैंकर, हिमालयन रिइन्स्योरेन्स, एचएलआई लार्ज क्याप फण्ड, हिमालयन क्यापसर्भ, क्रेष्ट माइक्रो लाइफ इन्स्योरेन्स, गार्डियन माइक्रो लाइफ इन्स्योरेन्स, लिबर्ट माइक्रो लाइफ इन्स्योरेन्स, प्रोटेक्टिभ माइक्रो इन्स्योरेन्स र हिमालयन लाइफ इन्स्योरेन्सको संलग्नता देखिएको छ ।

उक्त कारोवारहरुबाट धितोपत्र सम्बन्धी ऐन, २०६३ को दफा ९६ को उपदफा (१) र दफा ९८ बमोजिमको कसूर भएको देखिएको छ । शुभी अग्रवाल, ऋषि राज मोर र धितोपत्र दलाल व्यवसायी भूकुटी स्टक ब्रोकिङ्ग कम्पनी प्रा.लि.का कार्यकारी प्रमुख चाचान मिलेर सूचीकृत संगठित संस्था गार्डियन माइक्रो लाइफ इन्स्योरेन्सको सेयरको मूल्य बढाउन भूमिका खेलेको देखिएको छ ।

उनीहरुले धितोपत्र सम्बन्धी ऐन, २०६३ को दफा ९६ को उपदफा (१) र दफा ९८ बमोजिमको कसूर भएको देखिएको छ । उक्त कारोवारमा हिमालयन रिइन्स्योरेन्स लि. र एचएलआई लार्ज क्याप फण्डको समेत संलग्नता देखिएको छ ।