काठमाडौं । सुदूरपश्चिम प्रदेशमा कृषि क्षेत्रलाई सुदृढ बनाउने महत्वपूर्ण कदमको रुपमा धनगढीमा कृषि क्षेत्रका लघु, साना तथा मझौला उद्यमीहरू संगको परामर्श कार्यक्रम सम्पन्न भएको छ । नेपाल उद्योग वाणिज्य महासंघअन्तर्गतको कृषि उद्यम केन्द्रको आयोजनामा कार्यक्रम सम्पन्न भएको हो ।

कार्यक्रममा प्रदेशका भूमि व्यवस्था, कृषि तथा सहकारीमन्त्री वीरबहादुर थापाले कृषि क्षेत्रका प्रमुख सरोकारवालाहरूलाई एकै ठाउँमा ल्याएर यस किसिमको महत्वपूर्ण परामर्शको आयोजना गरेकोमा कृषि उद्यम केन्द्रको प्रशंसा गर्दै स्थानीय स्तरमा उत्पादित कृषि उत्पादनहरूको प्रबर्द्धन गर्न उत्पादक कृषकका साथै लघु, साना तथा मझौला उद्यमीहरू समेतलाई सहयोग गरी सुदूरपश्चिम प्रदेशको कृषि क्षेत्रलाई रूपान्तरण गर्ने प्रतिबद्धता व्यक्त गरे ।

यो प्रदेशभित्र कृषि व्यवसायमा संलग्न व्यवसायीहरूको वर्तमान अवस्था मूल्यांकन गर्ने, उनीहरुका लागि सहयोगी नीतिहरुको लेखाजोखा गर्ने, कृषि उद्यम केन्द्रद्वारा संचालित लघु, साना तथा मझौला उद्यमी सहयोग कार्यक्रममा संलग्न उद्यमीहरूबाट सफलताका कथाहरू साझा गर्ने र आवश्यक नीति तर्जुमाको सिफारिस गर्ने कार्यक्रमको मुख्य उद्देश्य रहेको यो कार्यक्रमका निष्कर्षहरूले स्थानीय, प्रादेशिक र संघीय स्तरका नीति निर्माताहरूलाई सुझाव पेश गर्ने छ ।

कार्यक्रममा कृषि उद्यम केन्द्र बोर्ड सदस्य सुनिता न्हेमाफुकीले प्यानल छलफल सञ्चालन गरेकी थिइन । जसमा प्रदेश नीति तथा योजना आयोगका सदस्य प्राध्यापक डा. जगतबहादुर सिंह रावल, प्रदेश कृषि निर्देशनालयबाट खगेन्द्र शर्मा; सुदुरपश्चिम महासंघ उपाध्यक्ष अनिल कुमार प्रदेश सहकारी संघका माधव शर्मा र असल सिर्जना कृषि सहकारी, लम्कीका कृष्णा घर्ती प्यानालिष्टको रूपमा रहेका थिए । उनीहरुबीच उद्यमीहरुको वर्तमान अवस्था, सम्भावना एवं चुनैतीका बारेमा छलपफ गरिएको थयो ।

कृषि उद्यम केन्द्रका अध्यक्ष डिबी बस्नेतले कृषिमा आबद्ध व्यवसायीहरूको अधिकार सुनिश्चित गर्न र नेपालभर कृषि व्यवसायीकरणलाई प्रवर्द्धन गर्न केन्द्रको निरन्तर प्रयास गरिरहेको बताए ।

बस्नेतले स्थानीय उत्पादक र व्यापारीहरूलाई बजारको अवस्था अनुकूल नभएसम्म आफ्नो सामान भण्डारण गर्न सातै प्रदेशका उत्पादन स्तरमा ठूला गोदामहरूको आवश्यकता रहेको बारे प्रकाश पार्दै गोदाम निर्माण र संचालनमा सरकारको ध्यानाकर्षण गराए । बस्नेतले स्थानीय व्वसायी मिलेर बनेको कम्पनीमार्फत कृषि व्यवसायीकरणको नमुना प्रारम्भ गर्न नेपाल उद्योग बाणिज्य महासंघलाई कम्तिमा ५० हेक्टर जग्गा एकै ठाउँमा उपलब्ध गराउन प्रदेश सरकारलाई आग्रह पनि गरे ।

समिटबाट डा. नारायण खनाल र सिचन श्रेष्ठ, सफल पार्टन व्यवसायी आशुतोष तिवारी र कृषि उद्यम केन्द्रका डिल्ली पौडेलले व्यवसाय प्रबर्द्धनका विविध विषयमा प्रस्तुति गर्नुका साथै कैलाली उद्योग वाणिज्य संघका उपाध्यक्ष दिनेश लम्सालले भारतको मकैको व्यवसायिक क्षेत्रको भ्रमणबाट आएका आफ्ना अनुभवहरू सुनाएका थिए । कार्यक्रममा कृषि उद्यम केन्द्रका का.मु. प्रमुख कार्यकारी अधिकृत दीपेन्द्र जोशीले संचालन गरेका थिए ।

सुदूरपश्चिम प्रदेशमा कृषि व्यवसायमा आवद्ध उद्यमीलाई बढावा दिने, कृषि विकासलाई प्रोत्साहन गर्ने र स्थानीय उद्यमीहरूलाइ अनुकुलनको अवस्था सिर्जना गर्ने उद्देश्यले संचालित यो कार्यक्रम सिमिटको सहयोगमा सेप्टेम्बर २०२३ देखि नोभेम्बर २०२४ सम्म लुम्बिनी र सुदूरपश्चिम प्रदेशका ६ वटा तराईका जिल्लामा सञ्चालित रहेको छ । केन्द्रले यस्तै किसिमको कार्यक्रम साउन २१ गते लुम्बिनी प्रदेशको नेपालगंजमा संचालन गरेको थियो ।