काठमाडौं । नेपाल र भारतबीच विद्युतीय भुक्तानी प्रणाली विकास गर्ने उद्देश्यले द्विपक्षीय नियामकीय संयन्त्र स्थापना गर्ने समझदारी भएको छ।

नेपाल राष्ट्र बैंक र भारतको केन्द्रीय बैंक आरबीआइबीच बिहीबार यस्तो सम्झौता भएको हो। भारतको युनिफाइड पेमेन्ट इन्टरफेस’ (युपीआई) र नेपालको ‘नेसनल पेमेन्ट्स इन्टरफेस’ ‘एनपिआइ’ मा द्विपक्षीय नियामकीय संयन्त्र स्थापना गर्ने समझदारी भएको हो।

गभर्नर महाप्रसाद अधिकारी र आरबिआई गभर्नर शक्तिकान्त दासको उपस्थितिमा भारतको मुम्बईमा  उक्त सम्झौता गरिएको थियो।  गत जेठमा प्रधानमन्त्री पुष्पकमल दाहाल ‘प्रचण्ड’को भारत भ्रमणका क्रममा नेपाल र भारतबीच अन्तरदेशीय डिजिटल भुक्तानी सुरु गर्ने सम्झौता भएको थियो।

नेपाल क्लियरिङ हाउस र भारतको नेसनल पेमेन्ट कर्पोरेसन अफ इन्डियाबीच अन्तरदेशीय विद्युतीय भुक्तानी सम्झौता भएको थियो। सो सम्झौतासँगै अन्तरदेशीय विद्युतीय भुक्तानी प्रक्रिया थप अगाडि बढेको हो।