काठमाडौं । वाणिज्य, आपूर्ति तथा उपभोक्ता संरक्षण विभागले चिनी आयात गर्न इच्छुक फर्म तथा कम्पनीसँग प्रस्ताव आह्वान गरेको छ ।

आज बिहीबार एक सूजना जारी गरी विभागले १९ हजार टन चिनी आयात गर्न प्रस्ताव आह्वान गरेको हो । भारतले नेपालका लागि तोकेको कोटाअनुसार १९ हजार टन चिनी आयात गर्ने भएको छ ।

चिनी आयातका लागि अनुमतिपत्र प्राप्त गर्ने फर्म तथा कम्पनीका लागि न्यूनतम कोटा २ हजार ६ सय टन तोकिएको छ । अनुमति पत्र प्राप्त गर्ने फर्म तथा कम्पनीले चिनी आयातका लागि सोमबार (साउन २८) सम्म प्रस्ताव पेस गर्न सक्नेछन् ।

१९ हजार टनभन्दा बढी परिमाण आयात अनुमतिका लागि आवेदन परे न्यूनतम २ हजार ६ सय टन कोटा नघट्ने गरी समानुपातिक रूपमा कोटा बाँडफाँड गरिने विभागले जनाएको छ ।

सातभन्दा बढी कम्पनीबाट आवेदन पर्यो भने सुरुमा आउने आवेदनलाई पहिलो प्राथमिकता दिइने विभागले जारी गरेको सूचनामा उल्लेख छ । अनुमति पाएको एक महिनाभित्र चिनी नल्याए अनुमति खारेज हुने समेत विभागले जनाएकोे छ ।

अनुमति प्राप्त कम्पनीले विभागबाट अनुमति प्राप्त गरेको मितिले साल्ट ट्रेडिङ कर्पोरेसनले निर्धारण गरेको मूल्यमा नबढ्ने गरी आयातित चिनी बजारमा बिक्री गर्नुपर्ने सर्त तोकिएको सूचनामा उल्लेख छ।