काठमाडौं । प्रविधिको तीव्र विकाससँगै डिजिटल साक्षरता आजको प्रमुख आवश्यकता बनेको छ। यसै सन्दर्भलाई आत्मसात गर्दै, लायन्स इन्टरनेसनल डिस्ट्रिक्ट ३२५ पि, नेपाल (लायन्स वर्ष २०२५–२०२६) अन्तर्गतको ‘ग्लोबल कजस् गुथ’ (युवा विकास) कार्यक्रम अन्तर्गत एक दिवसीय ‘आधारभूत एआई तालिम’ आयोजना हुन गइरहेको छ।
यस कार्यक्रमको मुख्य आयोजक लायन्स क्लब अफ देवदह (क्लब आईडीस् १२५६८०) रहेको छ भने प्राविधिक साझेदारका रूपमा लुम्बिनी टेक इनोभेसन सेन्टर जोडिएको छ।
यो तालिम आगामी ७ असार २०८३ मा ओमसतिया–६, नारायणपुरस्थित रामजानकी रंगशालामा आयोजना हुनेछ। ‘सेवा गर्न नेतृत्व गर्नुहोस्–नेतृत्व गर्न सेवा गर्नुहोस्’ र शुभ हृदयहरू, सहयोगी हातहरू, भन्ने लायन्सको सेवाभावको मूल नारासहित आयोजना हुन लागेको यस कार्यक्रमले युवाहरूलाई प्रविधिको नयाँ युगसँग जोड्ने विश्वास लिइएको छ।
सुरुवाती चरणका लागि आर्टिफिसियल इन्टेलिजेन्स प्रविधिको क्षेत्रमा आफ्नो सीप विकास गर्न चाहनेहरूका लागि लुम्बिनी टेक इनोभेसन सेन्टरले विभिन्न एआई–पावर्ड कार्यक्रम, तालिम र डिजिटल उपकरणहरू उपलब्ध गराउँदै आएको छ। यस तालिमले सहभागीहरूलाई एआईका आधारभूत सिद्धान्त बुझ्न, प्रविधिको सही प्रयोग गर्न र उपलब्ध संसाधनहरूको अधिकतम लाभ उठाउन सघाउनेछ।
समावेशी शिक्षा र ‘एआई–लर्नर्स’मा जोड तालिमको मुख्य आकर्षणको रूपमा लुम्बिनी टेक इनोभेसन सेन्टरका संस्थापक निर्देशक कृष्ण सापकोटाको विशेष प्रस्तुति रहनेछ। उनले एआई प्रविधिको व्यावहारिक प्रयोग र विशेषगरी अपाङ्गता भएका विद्यार्थीहरूका लागि उपयोगी प्लेटफर्म बारे जानकारी गराउने छन्।
एआई–लर्नर्सले व्यक्तिगत रूपमा डिजाइन गरिएका खेलहरू र एनेलिटिक्सको माध्यमबाट फरक क्षमता भएका बालबालिकालाई प्रारम्भिक गणित, साक्षरता र सामाजिक सीपहरू सिकाउन मद्दत गर्दछ।
आफ्नो डिजिटल यात्रा सुरु गर्न चाहने विद्यार्थी, शिक्षक तथा प्रविधिप्रेमी युवाहरूका लागि यो तालिम नयाँ सम्भावनाको ढोका खोल्ने एउटा सुनौलो अवसर साबित हुनेछ।
प्रतिक्रिया दिनुहोस्