काठमाडौं । प्रधानमन्त्री बालेन्द्र शाह (बालेन) को नेतृत्वमा सरकार बनेको छ । शाहको नेतृत्वमा बनेको सरकार समावेशिता र सन्तुलनको देखिएको छ ।

यो सरकारमा ३३ प्रतिशत महिला सहभागिता भएको छ । यो सरकारमा सबै प्रदेशको प्रतिनिधित्व भएको छ । साथै, इतिहासमै पहिलो पटक बादी समुदायबाट मन्त्री नियुक्त गरिएको छ ।

यस पटकको मन्त्रिपरिषदमा कानून, न्याय तथा संसदीय मामिला मन्त्रीमा सोविता गौतम नियुक्त भएकी छिन् । उनी चितवन–३ बाट प्रतिनिधिसभा सदस्यमा निर्वाचित भएकी हुन् । युवा पुस्ताबाट उदाएकी गौतमले परम्परागत राजनीतिक शक्तिहरूलाई चुनौती दिँदै ठूलो मतान्तरले विजय हासिल गरेकी छिन् । यस अघि उनी सांसद बनिसकेकी छिन् ।

यस्तै एक दशकभन्दा बढी समय पत्रकारिता गरेर राजनीतिमा लागेकी प्रतिभा रावल रास्वपाबाट समानुपातिक सांसद बनेकी छिन् । उनले साउथ एसिया चेक, रिपब्लिका र ग्यालेक्सी टिभी लगायतमा काम गरेकी थिइन् । रावल सुदूरपश्चिमको प्रतिनिधित्व गर्दै सहकारी तथा गरिबी निवारण र संघीय मामिला तथा समान्य प्रशासन मन्त्री बनेकी छन्।

तराई क्षेत्रबाट उदाएकी नेतृ गीता चौधरी कृषि तथा पशुपक्षी विकास तथा वन तथा वातावरण मन्त्रीमा नियुक्त भएकी छिन् । उनी कृषि उत्पादन वृद्धि, आधुनिक प्रविधिको प्रयोग र बजार पहुँच विस्तारका मुद्दामा लामो समयदेखि सक्रिय रहँदै आएकी छिन् । कञ्चनपुरको शुक्लाफाँटा नगरपालिका–४ की ३३ वर्षीय चौधरी अधिवक्ता हुन् । उनी प्रतिनिधि सभा सदस्य निर्वाचनमा समानुपातिकतर्फ निर्वाचित भएसँगै मन्त्री बनेकी हुन ।

बालेन नेतृत्वको सरकारको स्वास्थ्य तथा जनसंख्या र खानेपानी मन्त्रीमा निशा मेहता नियुक्त भएकी छन् । उनी पेशाले नर्स हुन् । उनी सुनसरीको इनरुवामा हुर्किएकी हुन । मेहता अस्पतालका वार्डमा बिरामीको सेवा गर्दै आएकी उनी रास्वपाको मधेसी समूदायको तर्फबाट समानुपातिक सांसद बनेकी हुन् ।

सरकारको मन्त्रिपरिषदमा बालबालिका तथा ज्येष्ठ नागरिक मन्त्रीमा सीता वादी नियुक्ती भएकी छिन् । बादी समुदाय नेपालको सबैभन्दा सीमान्तकृत समुदायमध्ये एक मानिन्छ। सिता वादी समुदायबाट मन्त्री पदमा नियुक्ति केवल एक व्यक्तिको उपलब्धि नभई राज्य संरचनामा लामो समयदेखि उपेक्षित समुदायको प्रवेशको प्रतीक मानिएको छ।